Këshilli i Prindërve kundër Qeverisë: Jo shkollës të shtunave

Këshilli i Prindërve të Kosovës e përsëritur sërish qëndrimin e tyre se janë kundër zëvendësimit të orëve mësimore të shtunave si pasojë e grevës gjatë muajit shtator, raporton Paparaci.

“Jo shkollës të shtunave, jo mësimit me zor. Fëmijët kanë të drejta-obligohemi t’i mbrojmë”, thuhet në reagimin e Këshillit të Prindërve.

Në anën tjetër, Ministria e Arsimit, Shkencës, Teknologjisë dhe Inovacionit ka njoftuar se këtë të shtunë do të mbahet mësim për nxënësit e klasave 1-8.

“Në bazë të kompetencave dhe përgjegjësive MAShTI e ka rishikuar kalendarin e vitit shkollor 2022-2023 dhe i ka njoftuar me kohë të gjitha Drejtoritë Komunale të Arsimit në lidhje me këto ndryshime. Bazuar në ndryshimet në kalendarin e rishikuar, ju informojmë se dita e shtunë, datë 15 tetor, do të jetë ditë pune për nxënësit e klasave 1-8, sipas orarit të përcaktuar nga shkollat”, thuhet në njoftimin e kësaj ministrie.