Këshilli i Drejtorëve të Komunës së Podujevës diskutoi për dinamikën në projekte kapitale

Në mbledhjen e Këshillit të Drejtorëve të Komunës së Podujevës, të cilën e udhëhoqi nënkryetari Nexhmi Rudari, u diskutua për dinamikën e zhvillimit dhe realizimit të projekteve kapitale, situatën me pandeminë dhe ndikimin e saj në realizimin e projekteve të ndryshme, njofton zyra për komunikim me publikun e kësaj komune, transmeton PodujevaPRESS.net

Në njoftim thuhet se “Për shkak të disa ngecjeve që janë shkaktuar si pasojë e situates së krijuar nga COVID-19, nënkryetari Rudari kërkoi nga drejtorët përshpejtim të dinamikës së realizimit të projekteve në harmoni me Ligjin e Prokurimit Publik”.

Drejtorët e drejtorive raportuan lidhur me projektet e planifikuara për realizim gjatë këtij viti buxhetor. Ndërsa, gjatë mbledhjes u kërkua angazhim më i madh sidomos në realizimin e projekteve infrastrukturore të cilat ndikojnë direkt në përmirësimin e jetës së qytetarëve.