Vdes mamia llapjane Sanije Topanica, iu ndihmoi grave në lindje gjatë luftës
KEDS mashtroi për reduktimet, gjobitet nga Zyra e Rregullatorit (Dokument)
Javën e kaluar, Zyra e Rregullatorit të Energjisë kishte gjobitur KEDS’in me 45 mijë euro për arsye se kishte aplikuar reduktime të energjisë duke u fshehur mbrapa “ndërprerjeve të planifikuara me qëllim të mirëmbajtjes”. Gazeta Express ka kontaktuar me të dyja palët, KEDS’s dhe ZRRE’në për këtë çështje, por vetëm këta të fundit kanë konfirmuar se pala e gjobitur ka paguar tashmë dënimin prej 45 mijë eurove.
Janarin e këtij viti ishte raportuar për ndërprerje të rrymës, me ç’rast KEDS dhe KEK shkëmbenin akuza për këtë ndërprerje. Disa muaj më pas, ZRRE’ja dënon KEDS’in me këtë shumë të parave.
Në njoftimin e dërguar nga ZRRE’ja javën e kaluar, thuhej se bordi kishte konstatuar se Operatori i Sistemit të Shpërndarjes (OSSH) nuk ka arritur të dëshmojë se të gjeturat nga monitorimi i ZRRE’së nuk janë të sakta dhe ka vendosur në bazë të Rregullores për Masa Administrative dhe Gjobat të shqiptojë dënimin në vlerë prej 45 mijë eurove.
Në një përgjigje për Express nga ZRRE’ja, thuhet se kanë pranuar dëshminë zyrtare se KEDS tashmë ka paguar gjobën e vënë nga Bordi i ZRRE’së, në llogarinë e Buxhetit të Kosovës.
Express e ka pyetur KEDS’in për këtë çështje, por kjo kompani deri tash nuk është përgjigjur.
Kujtojmë që në nëntor të 2016’ës, ZRRE përmes një hetimi preliminar kishte konstatuar se KEDS ka mashtruar me planin e mirëmbajtës së rrjetit. Ky plan nga KEDS-i ishte planifikuar për një periudhë të shkurtër kohore, por KEDS kishte gjetur mënyrën për të aplikuar reduktime nën arsyetimin e mirëmbajtjes së rrjetit.
Por pas një periudhe të gjatë kohore, KEDS detyrohet t’i ndal reduktimet me arsyetimin e mirëmbajtjes së rrjetit, pasi këtë ia ka ndaluar ZRRE’ja pas një hetimi preliminar që e ka bërë me kërkesë të deputetit të LDK-së, Muhamet Mustafa /GazetaExpress/
