Katër vite me plot skandale: Akuza, hetime, raporte alarmuese e tenderë të dyshimtë nën qeverisjen e Shpejtim Bulliqit në Podujevë

Në Komunën e Podujevës, e udhëhequr nga Shpejtim Bulliqi, po shtohen raportimet për keqpërdorime në të gjitha nivelet e qeverisjes lokale. Nga konkurset për punësim deri te tenderët publikë, gjetjet e institucioneve mbikëqyrëse dhe reagimet e shoqërisë civile po e nxjerrin në pah një situatë të rëndë të menaxhimit komunal.

Këshilli i Pavarur Mbikëqyrës për Shërbyesit Civil ka gjetur shkelje të shumta në konkurset e punësimit, duke konstatuar parregullësi serioze në proceset rekrutuese. Për pasojë, një numër i konsiderueshëm konkurseve është anuluar, duke ngritur dyshime të forta se punësimet janë orientuar drejt interesave të ngushta politike.

Situata nuk është më e mirë as te tenderët publikë. Sipas të dhënave, në mbi 99% të rasteve gjatë katër viteve të fundit, fitues dalin vetëm kompanitë që ofrojnë çmimet më të larta, duke u shpallur të suksesshme në mënyrë të përsëritur dhe duke eliminuar operatorët që ofrojnë më lirë. Ky model ka ngritur shqetësime serioze për mungesë të konkurrencës së ndershme dhe korrupsion të organizuar në prokurimet komunale.

Shembujt konkretë janë të shumtë. Shkollat e ashtuquajtura “moderne”, të financuara me shuma të mëdha, janë shndërruar në simbol të dyshimeve për keqpërdorim. Ka raste ku në projekt është paraparë ndërtim me tulla të plota, por në realitet janë përdorur gjysmë-tulla, duke ulur ndjeshëm cilësinë dhe duke rritur fitimin e kompanive. Për këto raste, Krimet Ekonomike kanë konfirmuar se disa tenderë janë nën hetim aktiv.

E njëjta situatë vërehet edhe te rrugët publike, ku projektet janë përshkruar si “investime kapitale”, por realiteti në terren tregon mungesë totale të cilësisë. Rruga “Skënderbeu”, e cila u promovua si projekt i madh, është kritikuar nga qytetarët për dëmtime të shpejta dhe punime joprofesionale, një tjetër shembull i keqmenaxhimit dhe mungesës së llogaridhënies.

Në administratë ndërkohë, janë evidentuar punësime të familjarëve, skandale në shkolla, ikje të shumë drejtorëve dhe selektime të dyshimta në prishjen e objekteve pa leje.

Raportet e auditorit të jashtëm kanë vazhduar të evidentojnë parregullësi financiare dhe shpenzime të paarsyetuara, ndërsa Prokuroria e Shtetit ka konfirmuar se dhjetëra zyrtarë komunalë janë intervistuar nga hetuesit policorë në kuadër të hetimeve për korrupsion dhe keqpërdorim detyre.

Përkundër të gjitha këtyre zhvillimeve, Komuna e Podujevës nuk ka dhënë ende përgjigje të qarta për akuzat serioze që e rëndojnë.

Sipas analistëve lokalë, qeverisja katërvjeçare e Shpejtim Bulliqit ka hyrë në krizë të thellë besueshmërie, duke dëmtuar rëndë imazhin e institucioneve publike dhe duke e kthyer Podujevën në shembull të një administrate të mbyllur e të politizuar.

Ndërkohë, Kosova ndodhet në prag të zgjedhjeve lokale, të cilat do të mbahen të dielën, ku edhe Llapjanët do të vendosin se kush do ta qeverisë komunën e tyre për katër vitet e ardhshme.

Këto zgjedhje pritet të jenë një test i rëndësishëm politik dhe moral për qeverisjen aktuale, pas një mandati të mbushur me skandale, akuza dhe hetime për keqpërdorime publike.