Kandidati i VV-së për kryetar: “LDK në Podujevë po shpërndan lajme të rrejshme”

Kohëve të fundit, janë ngritur disa akuza ndaj kandidatit të Lëvizjes Vetëvendosje, për kryetar të Podujevës, Shpejtim Bulliqi, i cili është akuzuar se ka tentuar “çrrënjosjen” e Rugovizmit në Podujevë.Këtyre akuzave u është përgjigjur vetë Bulliqi në një bisedë për Gazeta Blic.

Ai ka thënë se kandidimi i tij për ta marrë drejtimin e Podujevës, është për qëllim të ndryshojë qeverisjen e keqe siç tha ai, e jo të çrrënjosë ideologji.

“Unë i pashë ato, por ato janë faqe fantome të LDK-së, që e di kush i mban. Unë nuk kam hyrë në këtë garë në Podujevë për ta bërë një qeverisje të mirë për Llapin. Unë nuk shkojë në Podujevë për ta çrrënësojë asnjë qeveri, unë dua që ta bëjë një qeveri të mirë”, ka thënë Bulliqi.

Bulliqi u shpreh i bindur në fitoren e tij dhe të Lëvizjes Vetëvendosje në Podujevë, dhe u zotua se nuk do ketë koalicion me asnjë parti politike, qoftë në raundin e parë ose eventualisht në balotazh.Ish-deputeti i LDK-së, foli edhe për periudhën sa ishte pjesë e partisë së Ibrahim Rugovës.

Tha se ndihet krenar që për 30 vite ka punuar në Lidhjen Demokratike dhe ka thurur lavde për ish-presidentin historik, Ibrahim Rugova.

“Pa fije dyshimi ne do ia dalim sepse është vullneti i qytetarëve për ndryshim. Unë besoj që Lëvizja Vetëvendosje do ta sjell ndryshimin në Podujevë. Në kombinimin e vetëm do ta kemi me qytetarët e Llapit. Unë kam punuar 30 vite për LDK-në dhe karrierën më të mirë timen e kam bërë për Lidhjen Demokratike dhe për Rugovën. Unë gjithmonë i kam mbështetur parimet e Rugovës mbi shtetndërtimin dhe prosporitetin e shtetit”, shtoi ai.

Shpejtim Bulliqi, si anëtar i Lidhjes Demokratike të Kosovës, për dy mandate radhazi ishte drejtor i Drejtorisë së Arsimit në Komunën e Podujevës.

I pyetur për punën e bërë si drejtor, Bulliqi u shpreh krenar, duke thënë se nga puna e tij janë shënuar shumë suksese.

“Është një periudhë shumë e bujshme me shumë rezultate dhe me shumë suksese që janë shumë të prekshme”, tha ai.

Në fund Bulliqi u zotua se nëse zgjidhet kryetar i Podujevës, do të fukusohet në drejtimin e komunës, por u shpreh se punën e tij si profesor do ta vazhdojë edhe më tutje.

“Unë jetoj në fshatin Lluga të Llapit dhe fokusimi im do të jetë Podujeva. Unë nuk do të marr detyra përvec funksionit që tashmë e kam, atë të profesorit, atë punë do ta bëjë edhe në të ardhmen”, ka përfunduar ai.Shpejtim Bulliqi përveç që ishte në dy mandate drejtor i Arsimit në Podujevë, ishte edhe deputet i Kuvendit nga radhët e Lidhjes Demokratike.

Bulliqi pas përplasjeve me kryetarin e degës së LDK-së në Podujevë, Agim Veliu, u largua nga kjo parti, dhe u anëtarsua në Lëvizjen Vetëvendosje.

Anëtarsimi i tij është bërë gjatë vitit të kaluar, duke kandiduar edhe për deputet nga partia e Kurtit.Bulliqi u zgjodh deputet i Kuvendit dhe tani synon ta marrë drejtimin e Komunës së Podujevës.

Përveç Bulliqit, kandidat për kryetar të Podujevës, janë Nexhmi Rudari nga Lidhja Demokratike dhe Naim Fetahu nga Partia Demokratike e Kosovës.

Zgjedhjet e jashtëzakonshme në Podujevë, do të mbahen me 15 mars, për shkak të dorëheqjes së kryetarit të Komunës, Agim Veliu, i cili u bë Ministër i Punëve të Brendshme në qeverinë aktuale.

LDK gjithmonë ka qenë triumfuese në zonën e Llapit.Që nga paslufta, Lidhja Demokratike e Kosovës, i ka fituar të gjitha zgjedhjet në Kosovë.