Kandidati i LDK’së për kryetar të Podujevës, optimist se do t’i fitojë zgjedhjet

Subjekti politik prej nga vjen edhe ish-kryetari i Podujevës, Agim Veliu, janë shprehur optimistë se do t’i fitojnë edhe këto zgjedhje të parakohshme për këtë komunë.

Kandidati i Lidhjes Demokratike të Kosovës, për kryetar të komunës së Podujevës, Nexhmi Rudari, në një prononcim për Gazetën Metro, duke treguar se kanë filluar përgatitjet për këto zgjedhje të jashtëzakonshme, ka lënë të kuptohet se partia të cilën e përfaqëson, beson se do t’i fitojnë zgjedhjet edhe këtë herë.

“Në mbledhjet e kryesisë së Degës së LDK’së në Podujevë, kemi biseduar për mobilizimin e strukturave dhe përgatitjet për zgjedhje, për të cilat besojmë që edhe këtë herë do t’i fitojmë”, ka thënë Rudari për Gazetën Metro.

Gjatë ditës së djeshme, Lidhja Demokratike ka deklaruar për përzgjedhjen e nënkryetarit Nexhmi Rudarit, për kandidatin e tyre për kryetar të Komunës së Podujevës, derisa afati për aplikim ishte deri më 17 shkurt (nesër).

Kujtojmë se qytetarët e kësaj komune do të dalin në votime më 15 mars, për të zgjedhur kryetarin e ri që do të udhëheqë me këtë komunë, pas dorëheqjes së ish-kryetarit, Agim Veliu, i cili pranoi detyrën e Ministrit të Punëve të Brendshme, në Qeverinë e drejtuar nga Albin Kurti.