Jasharaj për grevën: Jemi në rrugë të Zotit, ju betohem se nuk lëshojmë pe

Këshilli Grevist i Bashkimit të Sindikatave të Pavarura të Kosovës sot kanë vizituar çerdhen “Yllkat”, pas vendimit për të hyrë në grevë të përgjithshme të gjitha çerdhet publike, kurse mësimdhënësit do të jenë në vende të punës, por nuk do të kryejnë asnjë detyrë që do ta kryenin në rrethana normale

E kryetari i këshillit grevist të SBAShK-ut, Rrahman Jasharaj tha se qeveria nëse dëshiron mund t’ua realizojë kërkesat për shtesat e mësimdhënësve dhe “jo të vajtojë”.

Para gazetarëve, Jasharaj tha duhet të arrihet një marrëveshje mes Sindikatave dhe Qeverisë së Kosovës, nëse jo u shpreh se janë në “rrugë të Zotit”.

“Banka Botërore tha se 19.1 për qind janë rritur çmimet, ndërkohë pagat s’kanë lëvizur që nga viti 2018, 4 për qind. Pra, Qeveria me dashtë mund t’i realizojë kërkesat tona e jo të vajtojë. Që sot, të shtunën e të dielën qeveria le të ulet me ne ta arrijë një marrëveshje të kuptueshme dhe situata do të qetësohet, nëse jo ne jemi në rrugë të Zotit dhe s’kemi pasur rrugë tjetër”, u shpreh ai.

Po ashtu, Jasharaj tha se nuk e kanë mendjen që të dorëzohen. Ai bëri thirrje që Qeveria Kurti të këndellet e të fillojë negociatat me ta.

“Të dorëzohemi nuk e kemi mendjen, e kemi zgjedhur rrugën e ligjshme që të hyjmë në grevë të përgjithshme. E dimë që o halli i përbashkët, ne nuk do të lëshojmë pe, po iu betohem para mediave. Uroj që qeveria të këndellet dhe të fillojë bisedat dhe të fillojë me zgjedhjen e kërkesave tona që janë legjitime”.