Vdes mamia llapjane Sanije Topanica, iu ndihmoi grave në lindje gjatë luftës
Ja emrat më të pëlqyer për fëmijë në Kosovë
Përzgjedhja e emrit është një nga pjesët më të bukura dhe më sfiduese për prindërit gjatë kohës kur ata presin ardhjen në jetë të fëmijës së tyre.
Kemi edhe raste kur prindërve përzgjedhjen e emrit ua bënë më të lehtë dëshira e tyre ose tradita familjare për të përtërirë emrat e anëtarëve të familjes, kryesisht të prindërve të tyre të cilët nuk jetojnë më.
Sipas Agjencisë së Statistikave të Kosovës, trendi i emrave të përzgjedhur nuk dallon shumë në këto tre vitet e fundit. Listës i prijnë emrat ndërkombëtarë, duke mos përjashtuar edhe një pjesë të atyre me kuptim fetar. Karakteristikë e gjithë kësaj janë emrat e shkurtër, të cilët tanimë veçse janë në krye të listave zyrtare të emrave.
Më poshtë janë paraqitur tabelat e trendit të emrave për vajza dhe djem në tre vitet e fundit në Kosovë, sipas ASK-së.
Duke bërë një krahasim të tabelave shihet mjaft qartë se emrat më të shpeshtë për vajza në këto tre vitet e fundi në Kosovë janë: Alea, Tuana, Erina, Sara, Suela dhe Anisa, ndërsa për djem janë emrat: Diar, Amar, Leart, Omer, Ensar dhe Dion.
Po ashtu sipas ASK-së gjatë vitit 2013, numri më i madh i nënave që kanë lindur fëmijë, është i grup-moshave:
25-29 vjeç – 35.1% të lindjeve
20-24 vjeç – 24.2% të lindjeve
30-34vjeç – 23.9%, të lindjeve
grup-moshat tjera përbëjnë 16.8% të numrit të përgjithshëm të lindjeve.
Ndërsa mosha mesatare e femrave që kanë lindur fëmijë në vitin 2013, është 28.1 vjeç.
Ajo e cila vlen të theksohet dhe vlerësohet është trendi në rritje i vënies së emrave shqiptarë. Ku për vajza më të shpeshtë janë emrat si: Era, Vlera, Vesa, Yllka, Aroma dhe Valëza, ndërsa për djem emrat si: Enis, Yll, Luan, Lum, Lekë dhe Drin.
Praktikat jetësore na e kanë dëshmuar se cilado që të jetë zgjedhja juaj, në fund fëmija është ai i cili do ta ngrohë dhe do i japë kuptim edhe më shumë emrit të tij.
