Ish-komandanti i ZOLl të UÇK-së, Rrustem Mustafa, kritikon Albin Kurtin për Dialogun Strategjik me ShBA-të

Rrustem Mustafa ka deklaruar se Departamenti i Shtetit ka demantuar kryeministrin Albin Kurti për çështjen e Dialogut Strategjik, duke theksuar se “deklarimet e tij janë të pasakta, dhe vendimi për pezullim bazohet në veprimet e qeverisë”.

Mustafa shton se krijimi i rrugëve të reja kërkon guxim dhe vendosmëri nga udhëheqësit. Ai përkujton se rrugët e partneritetit që kontribuan në krijimin e shtetit të Kosovës nuk u hapën rastësisht, por me pjesëmarrjen e UÇK-së dhe guximin e udhëheqësit Hashim Thaçi, i cili dinte se nga t’ia fillonte.

Ky është postimi i tij: 

“Departamenti i Shtetit demanton Kurtin për Dialogun Strategjik: Të pasakta deklarimet e tij, vendimi për pezullim bazohet në veprimet e qeverisë.”

Rrugët nuk hapen vetë

Ndjekësit duhet ta dinë se sa e vështirë është dhe sa guxim kërkon nga udhëheqësi krijimi i një rruge të re.

Duhet guxim t’i çelësh aty ku duket se nuk ka dalje.

Kur ato bëhen të lehta për t’u kaluar, shumëkush harron kush i hapi.

Por sa herë që bëhen sërish të vështira, të gjithë kërkojnë udhëheqësin.

Rrugët e partneritetit që krijuan shtetin tonë nuk lindën rastësisht, ato u hapën me UÇK-në dhe me guximin e udhëheqësit Hashim Thaçit, që dinte nga t’ia fillonte.