Ish-komandanti i UÇK-së, Ajet Potera, me mesazh të fortë për zgjedhjet në Podujevë: “Të korruptuarit i largojmë me votë!”

Ish-komandanti i Ushtrisë Çlirimtare të Kosovës, Ajet Potera, ka reaguar me një status të fuqishëm lidhur me zgjedhjet lokale që do të mbahen më 12 tetor në Podujevë. Mesazhi i tij shihet si kritikë indirekte ndaj kandidatit aktual të Vetëvendosjes, Shpejtim Bulliqi, dhe menaxhimit të pushtetit lokal.

Potera ka theksuar se qytetarët sot kanë vetëdije më të lartë politike dhe se korrupsioni mund të ndëshkohet më lehtë se kurrë më parë – përmes votës. Ai ka kërkuar mobilizim qytetar për ta larguar nga vendimmarrja secilin që ka keqpërdorur pozitën dhe buxhetin publik.

“Të korruptuarit sot në institucione i largojmë nga vendimmarrja më lehtë se kurrë më parë! Kemi një vetëdije të re qytetare dhe një vendosmëri të qartë politike, për Komunën dhe për Republikën! Ata që kanë keqpërdorur pozitën dhe buxhetin e qytetarëve nuk kanë vend në institucione. Ne, me përgjegjësi të lartë dhe vendosmëri, këtë e vulosim në kutitë e votimit”, ka shkruar Potera.

Ai ka bërë thirrje që më 12 tetor qytetarët e Podujevës të shkojnë në votime të bashkuar, duke përdorur votën si mjet demokratik për largimin e “të korruptuarve” nga pushteti.

Sipas tij, ky është një obligim qytetar dhe moral, sidomos ndaj fëmijëve dhe të ardhmes së vendit:

“Më 12 tetor, së bashku, i rrëzojmë të korruptuarit me votën tonë!”, ka përfunduar Potera.