Ish-këshilltarët e Thaçit cak i bastisjeve, Specialja e konfirmon se po zhvillon operacione të vazhdueshme

Gjykata Speciale sot ka vazhduar aksionin në Prishtinë, ku është bastisur shtëpia e një tjetër këshilltari të ish presidentit Hashim Thaçi, Artan Behramit. Përveç tij, cak i bastisjeve gjatë ditës së djeshme ishin edhe dy ish-këshilltarët e tjerë të Thaçit, Bashkim Smakaj dhe Blerim Shala.

Nga Haga e kanë konfirmuar tashmë aksionin e sotëm, në kuadër të operacioneve siç i kanë quajtur “të vazhdueshme”.

“Zyra e Prokurorit të Specializuar (ZPS) është duke zhvilluar operacione të vazhdueshme në Kosovë. Operacionet e ZPS-së po mbështeten nga Policia e Kosovës dhe Misioni i Bashkimit Europian për Sundimin e Ligjit në Kosovë (EULEX)”.

Sinjali raportoi të hënën ekskluzivisht për operacionin e zhvilluar dje në mëngjes, ku u bastisën shtëpia e Bashkim Smakajt, ish shef i AKI-së, që ishte dikur edhe këshilltar i ish presidentit Thaçi dhe ish këshilltarit tjetër të tij, Blerim Shala.

Ndryshe, pas përfundimit të bastisjeve në shtëpinë e Smakajt, është deklaruar avokati i tij, Artan Qerkini, i cili tha se janë marrë dokumente, të cilat aktualisht nuk dihen se të çfarë rëndësie janë.

“Dokumentet janë marrë. A është marrë ndonjë dokument që është i ndjeshëm për sigurinë e shtetit të Kosovës, kjo mbetet të shihet”, tha ai në një deklarim para gazetarëve.

Ai tha se hetuesit kanë bastisur me arsyetimin se në shtëpinë e Smakajt “mund të gjenden prova me relevancë për procedurat që janë duke u zhvilluar”.