Ish-drejtorët e qeverisjes së Bulliqit bashkë me Ajet Poterën: Çka po paralajmërojnë?!

Ish-drejtorë të rëndësishëm të qeverisjes komunale në kohën e Shpejtim Bulliqit janë bashkuar rreth qëndrimit kritik ndaj mënyrës se si është udhëhequr Podujeva në atë periudhë.

Bujar Hasani, ish-drejtor i Urbanizmit, Bedri Maqastena dhe Besnik Mulliqi, ish-drejtorë të Inspeksionit, si dhe vetë Ajet Potera, i cili po ashtu mbajti pozitën e drejtorit të Inspeksionit, ishin pjesë e kabinetit të Bulliqit. Por të gjithë këta u larguan nga pozitat e tyre pasi, siç theksohet, nuk pranuan “degradimin e qytetit” që kërkonte kryetari Bulliqi.

Në një shkrim të tij, Potera ka theksuar se sot është takuar me miqtë e tij e bashkëluftëtarë: Ismail Revuçi – mësuesin, Rifat Malokun – Shpatin, Bedri Maqastenën, Bujar Hasanin dhe Besnik Mulliqin.

“Janë njerëz të nderuar e të respektuar në Llap e më gjerë! Ushtarakë, profesionistë e intelektualë me vlera të mëdha, të cilët i çmoj jashtëzakonisht. Vlerësoj mendimin e tyre për çështje të ndryshme nga siguria dhe mbrojtja, deri te politika dhe vendimmarrja publike,” ka shkruar Potera.

Ai shtoi se sot vendi dhe komuna po përballen me dukuri të rënda si korrupsioni dhe keqpërdorimi i pozitës publike e i buxhetit të shtetit.

“Ata që kryejnë këto veprime nuk kanë respekt për sakrificën ndër breza, për ata që dhanë gjakun për lirinë tonë. Me duar të padenja dhe me qëllime të ulëta, po keqpërdorin dokumentet zyrtare me simbolet e Republikës së Kosovës! Kështu si ne mendojnë edhe qindra e mijëra bashkëluftëtarë e qytetarë tanë, dhe ky është një zë që askush nuk mund ta injorojë,” theksoi ai.

Ky reagim shihet si një sinjal i fortë politik përballë qeverisjes aktuale në Podujevë dhe një rikujtim se zërat kritikë ndaj degradimit urban e institucional nuk janë heshtur.