Isak Shabani i PDK-së zgjidhet Kryesues i Kuvendit Komunal të Podujevës 

Me pjesëmarrjen e 22 anëtarëve të Kuvendit Komunal të Podujevës, sot është zgjedhur Kryesuesi i Kuvendit Komunal. Nga votimi, 21 anëtarë votuan pro, ndërsa një ishte abstenim, duke e zgjedhur në këtë pozitë Isak Shabanin, kryetar i degës së PDK-së në Podujevë.

Gjatë seancës, kryetari i Komunës, Shpejtim Bulliqi, deklaroi se Lëvizja Vetëvendosje (VV), si parti më e madhe në Kuvend, nuk ka interesim që të propozojë kandidat për këtë pozitë.

Ndërkohë, LDK e cilësoi procesin si farsë, duke akuzuar se ekziston një marrëveshje politike ndërmjet VV-së dhe PDK-së. Përfaqësuesit e LDK-së thanë se nuk do të propozojnë kandidat dhe as nuk do të marrin pjesë në votim, duke e kundërshtuar formën dhe mënyrën e zgjedhjes.

Sipas burimeve të PodujevaPRESS, VV dhe PDK kanë arritur një marrëveshje politike, e cila përfshin jo vetëm zgjedhjen e Kryesuesit të Kuvendit Komunal, por edhe ndarjen e dy drejtorive komunale, konkretisht Drejtorinë e Administratës dhe Drejtorinë e Bujqësisë.