Inicohen procedurat për ndërtimin e Kuzhinës Qendrore në Podujevë

Po e nisim javën me një lajm të jashtëzakonshëm për një projekt të ri që do të ndikojë drejtpërdrejt në jetën e fëmijëve dhe komunitetit arsimor në Podujevë. Janë inicuar procedurat për ndërtimin e Kuzhinës Qendrore, një projekt me vlerë 700 mijë euro, që do të përgatisë dhe shpërndajë ushqim të ngrohtë për të gjithë fëmijët në çerdhe si dhe për nxënësit dhe personelin arsimor të shkollave fillore në komunën tonë, njofton portali PodujevaPRESS.

Këtë postim e ka bërë para pak minutash kryetari i Komunës së Podujevës, Shpejtim Bulliqi, i cili ka theksuar rëndësinë e këtij projekti për përmirësimin e mirëqenies së fëmijëve dhe si një hap konkret drejt organizimit të mësimit gjithëditor në shkolla.

“Së bashku me investimet që kemi bërë dhe po vazhdojmë të bëjmë në infrastrukturën arsimore, po krijojmë kushte më të mira për zhvillimin, edukimin dhe kujdesin ndaj brezave të rinj,” ka shkruar Bulliqi në postimin e tij.

Ky projekt pritet të ketë ndikim të madh social dhe edukativ në Komunën e Podujevës dhe të jetë një model për komunat e tjera në vend.