Inatet e Qeverisë Kurti me Presidencën: Konjufca shkarkoi ambasadorët e emëruar nga PDK, por jo ata të AAK’së

Ministri i Punëve të Jashtme, Glauk Konjufca, dje njoftoi tërheqjen e 7 Ambasadorëve nga vende të ndryshme të botës, duke përfshirë edhe ambasadoren Vlora Çitaku në SHBA. Ky inat i Qeverisë me anëtarët e partisë tashmë opozitare, PDK’së, siç duket nuk është i njëjtë edhe me ata të AAK’së. Kjo pasi asnjë prej ambasadorëve politik të emëruar nga Ramush Haradinaj nuk është shkarkuar, shkruan Gazeta Metro.

Ani pse s’ka fuqi ligjore dhe kushtetuese, Ministri i Punëve të Jashtme dhe Diasporës, Glauk Konjufca, ka kërkuar që të lirohen nga detyra shtatë ambasadorë, në mesin e tyre edhe Vlora Çitaku.

“Që në fillim të mandatit jam zotuar për vendosjen e rregullit dhe ligjit në Ministrinë e Punëve të Jashtme dhe Diasporës”, kështu u deklarua dje Konjufca, teksa njoftoi për këtë veprim.

Vlora Çitaku, Edon Cana, Lirim Grejçevci, Shpend Kallaba, Mimoza Ahmetaj, Ylber Hysa, Ramadan Avdiu, janë ambasadorët të cilët Konjufca po dëshiron t’i shkarkojë, e që shumica prej tyre vijnë nga PDK.

Mirëpo, Ministri i Jashtëm nuk ka guxuar t’i shkarkojë ambasadorët politik të LDK’së që e ka partnere në koalicion e as ata të AKR’së, parti kjo që e votoi Qeverinë Kurti.

Përveç këtyre, Konjufca nuk kërkoi tërheqjen as të ambasadorëve që vijnë nga AAK’ja, parti kjo që kohëve të fundit po kundërshton fuqishëm VV’në e Albin Kurtin, shkruan Gazeta Metro.

Avni Arifi – Ambasador në Emiratet e Bashkuara

Këshilltari kryesor i kryeministrit Ramush Haradinaj, Avni Arifi u emërua ambasador në Emiratet e Bashkuara gjatë qeverisjes së AAK’së.

Këtë detyrë ai edhe zyrtarisht e pranoi më 17 prill të vitit 2019. I njëjti vazhdon punën e tij ende.

Arbër Vllahiu – Ambasador në Çeki

Arbër Vllahiu u emërua Ambasador i Kosovës në Çeki në vitin 2018.

Pak para se të emërohej, ai punonte në zyrën e kryeministrit Haradinaj, ndërsa ishte anëtarësuar në partinë e tij, Aleancën për Ardhmërinë e Kosovës, duke u bërë edhe kandidat i kësaj partie për kryetar të Prishtinës.

Beqë Cufaj – Ambasador në Gjermani

Beqë Cufaj u emërua nga Presidenca e Kosovës ambasador në Gjermani, më 12 prill të vitit 2018. Ky njihet si një përkrahës i AAK’së dhe Ramush Haradinajt.

Kujtojmë se lidhur me propozimin e Konjufcës, nuk është deklaruar zyrtarisht Presidenti i vendit Hashim Thaçi, por dihet se Konjufca ka fuqinë ligjore të bëjë propozimin por jo edhe të marrë vendimin final për të kthyer apo shkarkuar një ambasador.

Kushtetuta e Republikës i jep kompetenca ekzekutive Shefit të Shtetit kur në pyetje janë emërimet dhe shkarkimet e udhëheqësve të ambasadave.