Ilir Deda, kandidat i LDK’së dhe Alternativës për Prishtinën?

Lidhja Demokratike e Kosovës (LDK) është në negociata me subjektin e ri politik, Alternativa, për një koalicion para zgjedhjeve të 11 qershorit.

Vet njëri nga themeluesit e Alternativës, Ilir Deda, e ka konfirmuar se partia e tij po negocion me LDK’në për të garuar në një listë zgjedhore, duke shtuar se po punohet për krijimin e një koalicioni, të përbërë nga LDK, Alternativa.

Por, burime të Gazetës Metro brenda LDK’së kanë bërë të ditur se pika ku negociatat mes LDK’së dhe Alternativës kanë ngecur, është që Deda kërkon që të bëhet kandidat i LDK’së dhe Alternativës për Komunën e Prishtinës, në zgjedhjet lokale që pritet të mbahen në vjeshtë.

I njëjti burim për gazetametro.net thotë se marrëveshja për koalicion mes LDK’së dhe Alternativës është e gati se e përfunduar, por, Kryetari i LDK’së Isa Mustafa, nuk po arrin t’i garantojë Dedës përkrahje për kandidimin në Komunën e Prishtinës në zgjedhjet e ardhshme lokale, kjo për shkak se degët e mëdha të partisë në Prishtinë nuk e shohin me sy të mirë që partia e tyre ta nominojë një kandidat nga një parti tjetër për Komunën e Prishtinës. /gazetametro/