I riu në Prishtinë kapet me plot monedha 2 euroshe false në bagazhin e veturës, përfundon në pranga

Trendi i parave të falsifikuara po vazhdon të ‘lulëzojë’ në Kosovë, ku qindra e mijëra euro fals vihen përditë në treg. Për një rast të tillë është arrestuar sot një person në Prishtinë, i cili u kap në flagrancë me qindra monedha false, raporton Gazeta Sinjali.

Përmes një komunikate për media, Policia njofton se 26-vjeçari është ndalur për kontroll dhe më pas në veturën e tij janë gjetur një sasi e konsiderueshme e monedhave metalike nga 2 €uro, për të cilat ekziston dyshimi i bazuar se janë të falsifikuara.

“Nga njësiti për krime ekonomike, me urdhër të gjykatës është bërë kontrolli I shtëpisë së personit të dyshuar ku janë gjetur dhe sekuestruar:

• 490 x 2 copë monedha metalike nga 2 €uro, gjithsejtë në vlerë 980 €uro;
• Automjeti Audi A4 i përdorur në rast
• 2 (dy) telefona celular;”, thuhet në njoftim

I dyshuari është arrestuar dhe është shoqëruar në stacion policor, ku është intervistuar lidhur me rastin.

Me urdhër të prokurorit, 26-vjeçari është dërguar në mbajtje nën dyshimet për kryerjen e veprës penale ‘Falsifikim i parasë’.