I riu hedh drunj në oborrin e një personi dhe ia thyen xhamat e shtëpisë, intervenon Policia

Një incident që shkaktoi sherr mes dy qytetarëve ka ndodhur dje në rrugën “Laura Shmani” në Prishtinë, ku është arrestuar një 19-vjeçar, i cili u denoncua nga një banor i asaj pjese. I dyshuari përfundoi në ndalim policor dhe ndaj tij tashmë kanë nisur hetimet, raporton Gazeta Sinjali.

Burimet brenda Prokurorisë kanë bërë me dije se i riu që u prangos po dyshohet se ka hedhur drunj në oborrin e viktimës, duke I shkaktuar dëme në shtëpinë e tij.

Për motive akoma të panjohura, si pasojë e gjuajtjes së drunjve, në shtëpinë e viktimës janë thyer xhamat, për çka ai u detyrua ta kërkojë ndihmën e Policisë.

Si rezultat i denoncimit, njësitet policore kanë dalë në vendin e ngjarjes, ku janë kryer ekzaminimet e nevojshme, ndërsa i dyshuari është shoqëruar në stacion.

I njëjti ka dhënë deklaratën e tij para hetuesve policorë lidhur me veprën me të cilën ngarkohet.

Ndaj tij, Prokurori i Shtetit ka urdhëruar masën e ndalimit policor dhe inicimin e hetimit për veprën penale “Asgjësim apo dëmtim i pasurisë”.