I moshuari dyshohet se u rrah nga djali dhe nipi – Prokuroria nis hetimet për dhunë në familje

Gazeta Sinjali mëson se një rast i rëndë i dhunës në familje ka ndodhur në fshatin Kaznik të Rahovecit, ku një burrë 94-vjeçar dyshohet se është sulmuar fizikisht nga djali dhe nipi i tij.

Sipas burimeve të Sinjalit, ngjarja dyshohet të ketë ndodhur më 08 qershor 2025, rreth orës 14:00, ndërsa Policia është informuar më vonë nga Spitali në Gjakovë, ku i moshuari kishte marrë trajtim mjekësor. Dyshimet për dhunë janë ngritur nga mjeku kujdestar, i cili ka lajmëruar Policinë pas deklaratave të viktimës.

Burime nga hetuesia bëjnë me dije se viktima, I.I, ka deklaruar se ishte sulmuar nga djali i tij, Xh. I. dhe nipi, N.I., në shtëpinë e tyre në Kaznik, përpara se të dërgohej te djali tjetër në Gjakovë.

Megjithëse nuk janë konstatuar lëndime të dukshme, viktima është intervistuar në praninë e përfaqësuesit të Qendrës për Punë Sociale në stacionin policor në Rahovec dhe më pas, me kërkesën e tij, është kthyer te djali në Gjakovë.

Ndërkohë, të dyshuarit – djali dhe nipi i të moshuarit – janë intervistuar dhe e kanë mohuar kategorikisht çdo formë dhune, duke deklaruar se i moshuari është larguar me vullnetin e tij pa ndonjë konflikt apo presion.

Pas intervistave, Prokuroria Themelore në Gjakovë ka urdhëruar inicimin e rastit si “Dhuna në familje” sipas nenit 248 të Kodit Penal, ndërsa hetimet do të zhvillohen në procedurë të rregullt.

Për rastin janë njoftuar edhe Mbrojtësi i Viktimave dhe Qendra për Punë Sociale. Rasti mbetet nën hetim.