Hysen Fazliu alarmon për vetëvrasjet e ish-ushtarëve të UÇK-së: Veteranët po ndihen të harruar nga shteti

Ish-zëdhënësi i Ushtrisë Çlirimtare të Kosovës (UÇK) në Zonën Operative të Llapit, Hysen Fazliu, ka ngritur shqetësimin e madh për numrin e vetëvrasjeve të ish-ushtarëve të UÇK-së, duke theksuar mungesën e rehabilitimit institucional për ta.

Në një kumtesë publike, Fazliu ka thënë se pas luftës, mijëra ish-ushtarë u kthyen në jetën civile me plagë të dukshme dhe të padukshme, ndërsa shumë prej tyre përballen ende me trauma të rënda psikologjike si stresi post-traumatik, depresioni dhe ankthi i vazhdueshëm.

Sipas tij, shteti nuk ka arritur të krijojë programe gjithëpërfshirëse për trajtimin dhe integrimin e tyre në shoqëri, duke i lënë shumë veteranë të izoluar dhe pa shpresë. Ai kujton edhe rastin e fundit në Podujevë, ku dy ish-ushtarë i dhanë fund jetës së tyre brenda 24 orëve, duke e cilësuar këtë si “krizë të thellë shoqërore dhe institucionale”.

“Vetëvrasjet e veteranëve të UÇK-së nuk janë thjesht tragjedi personale; ato janë pasqyra e një shoqërie që ka dështuar t’u japë përkujdesjen e merituar atyre që sakrifikuan për lirinë e Kosovës,” ka theksuar Fazliu.

Ai apelon që Qeveria e Kosovës, Ministria e Shëndetësisë, Ministria e Punës dhe Mirëqenies Sociale, si dhe shoqëria civile, të ndërmarrin hapa urgjentë për krijimin e qendrave të rehabilitimit psiko-social dhe për një strategji gjithëpërfshirëse të kujdesit ndaj veteranëve.

“Kujdesi për ta nuk është vetëm detyrë shtetërore, por është respekt ndaj sakrificës së tyre dhe themel i moralit tonë,” përfundon Fazliu.