Podujevë: I mituri kapet në flagrancë me armë zjarri, përfundon në Polici
Hoti kundër Qeverisë gjithëpërfshirëse dhe koalicionit me VV’në
Koalicioni LAA, nuk e përkrahë idenë e themelimit të një Qeverie gjithëpërfshirëse për tejkalimin e krizës politike në vend. Avdullah Hoti, shefi i Grupit Parlamentar të LDK’së, dhe kandidat për kryeministër nga radhët e koalicionit LAA, duke iu përgjigjur pyetjeve të Gazetës Express, ka përjashtuar edhe koalicionin me VV’në sepse ka sulmuar institucionet e vendit.
Deputeti i LDK’së Arben Gashi dje ka deklaruar se formimi i një qeverie gjithëpërfshirëse do të mundësonte që vendi të dilte nga kriza politike. Por ndryshe mendon Avdullah Hoti, shefi i grupit parlamentar të këtij subjekti.
Hoti të martën për Express, ka deklaruar se PDK nuk e ka shumicën.
‘’Qëndrimi i Koalicionit të LDK-së është i qartë. Zgjedhjet e fundit kanë prodhuar një rezultat, ku PDK nuk mund të bëjë shumicën parlamentare“, ka thënë Hoti për Express.
Hoti tutje është shprehur se LDK nuk do të bëjë koalicion me PDK’në e as Vetëvendosjen, pavarësisht se kjo e fundit haptas e ka ftuar për koalicion LDK’në.
”Qeveria e re nuk mund të udhëhiqet nga njerëz që kanë kapur institucionet, dhe as nga njerëz që kanë sulmuar institucionet”, ka deklaruar Hoti
E ndërkohë ai është shprehur se do të punojnë për ta bërë shumicën e nevojshme në mënyrë që me vendin të udhëheq koalicioni LAA.
”Vetëm koaliconi i LDK-së mund të formojë një shumicë të tillë. Ne do të angazhohemi që të formojmë shumicën e nevojshme për të udhëhequr me vendin, një shumicë që siguron Qeveri proevropiane, me fokus të qartë në sundimin e rendit dhe ligjit, një qeverisje me duar të pastra. Është vetëm LDK që mund t’i ofrojë vendit një qeveri të tillë, duke u nisur nga përvoja institucionale që ka”, ka thënë për Express Hoti./G.H/GazetaExpress/
