Heshtje shqetësuese e Prokurorisë për Podujevën – pse nuk ka asnjë reagim për vjedhjet e votave?

Ndërsa në disa komuna të Kosovës Prokuroria ka ndërmarrë veprime konkrete, me dhjetëra arrestime dhe masa paraburgimi për shkak të manipulimeve me vota, në Podujevë vazhdon një heshtje e plotë institucionale, pavarësisht se procesi i rinumërimit ka zbuluar parregullsi dhe ende nuk ka përfunduar.

Në Malishevë janë arrestuar 15 kryesues, në Prizren janë lëshuar 109 ndalime, ndërsa 23 persona ndodhen në paraburgim. Po ashtu, në Drenas Prokuroria ka autorizuar Policinë për hetime për mospërputhje serioze në rezultatet e rinumërimit.

Në anën tjetër, në Komunën e Podujevës, ku deri më tani është përfunduar rinumërimi i rreth 59% të vendvotimeve, nuk ka asnjë reagim zyrtar nga Prokuroria, as për hetime, as për intervista dhe as për masa ndaj personave përgjegjës.

Kjo situatë po ngre dyshime serioze në opinionin publik lokal, sidomos duke pasur parasysh se edhe në Podujevë janë evidentuar mospërputhje gjatë procesit të rinumërimit, por përkundër kësaj, nuk ka asnjë veprim konkret nga organet e drejtësisë.

Mungesa e transparencës dhe trajtimi i pabarabartë i komunave po e dëmton besimin e qytetarëve në sistemin e drejtësisë dhe po shton pyetjen legjitime:

Pse në komunat tjera ka arrestime, ndërsa në Podujevë Prokuroria po hesht?

Qytetarët e Podujevës kanë të drejtë të dinë nëse edhe në këtë komunë do të ketë hetime serioze dhe përgjegjësi penale për çdo shkelje të mundshme të vullnetit të votuesve.