Haradinaj: Thaçi ka të drejtë, qershori është opsion real për liberalizim të vizave

Kryeministri Ramush Haradinaj i ka dhënë të drejtë Presidentit Hashim Thaçi, kur ka deklaruar këto ditë se në qershor të këtij viti ka gjasë të Kosovës t’i hiqen vizat.

“Presidenti ka të drejtë, qershori është opsional. Jemi marrë vesh mos të flasim shumë por të kryhet punë”, ka thënë Haradinaj pas mbledhjes së Qeverisë.

“Unë synojë të kryhet edhe më herët. Qershori është opsion real. Gjendja ka ndryshuar pas qëndrimit të Berlinit zyrtar”.

Kryeministri i Kosovës Ramush Haradinaj ka folur edhe  për kërkesën e LDK-së, për heqjen e taksës ndaj shtetit serb.

Haradinaj ka thënë se po insistohet që taksa të hiqet për shkak të ruajtjes së miqësisë me Amerikën.

Por i pari i ekzekutivit ka thënë se nëse ata po duan ta dëgjojnë dhe ta ruajnë miqësinë me Amerikën atëherë le të ulen në tavolinë e bisedimeve.

Haradinaj ka thënë se Amerika po kërkon edhe bashkim në dialogun me Serbinë, andaj nëse LDK dëshiron ta dëgjojë Amerikën le të ulen në tavolinën e bisedimeve dhe të bëhen pjesë e dialogut.

Ndërsa ka theksuar edhe njëherë se taksa nuk do të hiqet pa pasur një garancë për njohje nga shteti serb.