Haradinaj takohet me Minxhozin, flasin për zgjedhjet e Kosovës

Kryetari i Aleancës për Ardhmërinë e Kosovës, Ramush Haradinaj në kuadër të takimeve me ambasadorë të akredituar në Kosovës, të premten ka zhvilluar një takim me ambasadorin e Shqipërisë, Qemal Minxhozi.

Haradinaj i cili është i nominuari për kryeministër nga koalicioni PAN, ka thënë se me Minxhozin kanë biseduar për procesin e zgjedhjeve të 11 qershorit, dhe krijimin e institucioneve.

“Sot prita në takim ambasadorin e Republikës së Shqipërisë z.Qemal Minxhozi, me të cilin bisedova për mbarëvajtjen e procesit të zgjedhjeve, si dhe rëndësinë e krijimit të shpejtë të institucioneve të Kosovës”, ka shkruar ai.

Haradinaj ka thënë se në takim kanë biseduar për rëndësinë e thellimit të bashkëpunimit të ngushtë mes Kosovës dhe Shqipërisë, në shërbim të forcimit të paqes dhe stabilitetit në rajon. /gazetametro/