Hamza tregon çka ndodh me pagesat nëse buxheti s’kalon

Ministri i Financave, Bedri Hamza, ka thënë se pret që buxheti i Kosovës për vitin 2019 të votohet nga deputetët e Kuvendit, pasi nëse ky buxhet nuk votohet Kosovën e presin probleme dhe pasoja të reja gjatë muajit shkurt, transmeton Gazeta Metro.

Hamza ka thënë se pagat për muajin janar në sektorin publik mund të ekzekutohen dhe nuk ka asnjë problem, mirëpo nëse buxheti nuk kalon ai ka thënë se Kosova do të përballet me pasoja të mëdha pasi që në muajin shkurt nuk mund të kryhet asnjë pagesë.

“Ne si shtet kemi të drejtë për muajin janar t’i kryejmë pagesat për 1/12, për muajin shkurt duke parë situatën që buxheti mundet me ardhën në seancë në fund të këtij muaji dhe deri të hymë në fuqi dhe deri të shpallet në gazetë zyrtare kalojnë disa kohë, ne kemi marrë vendim në qeveri për zgjatjen e shfrytëzimit ndarjeve buxhetore për 1/12 edhe për muajin shkurt, vendimi është shqyrtu dhe aprovu në Komisionin për Buxhet dhe Financa dhe pres që të jetë në seancë të Kuvendit, nëse vendimi kalon ne ligjërisht e fitojmë të drejtën që edhe për muajin shkurt t’i kryejmë pagesat” tha Hamza, transmeton Gazeta Metro.

Nuk mund të ketë paga për muajin shkurt ka thënë Hamza nëse nuk kalohet buxheti për vitin 2019 në Kuvendin e Kosovës, ani pse shteti ka para në dispozicion.

“Në situatën hipotetike që nuk besoj se do të ndodhë, nëse vendi nuk ka buxhet të aprovim, nëse vendimi për zgjatjen e ndarjeve buxhetore nuk kalon në Kuvend, asnjë pagesë për muajin shkurt nuk mund të ndodhë, përveç pagesave për borxhin, domethënë vendi me mbet pa buxhet nuk ka mundësi me u kry pagesat sa do që shteti ka para në dispozicion”, tha Hamza.

Hamza në fund ka treguar se koalicioni qeverisës ka votat për votimin e buxhetit për vitin 2019.

“Do të jenë numrat për votimin e buxhetit të Kosovës”, tha Hamza.

Metro edhe dje ka raportuar se Qeveria Haradinaj ka votat e PSD’së për votimin e buxhetit./gazetametro.net