Hajnat në një shtëpi në Podujevë i vjedhin 5 mijë euro para e stoli ari në vlerë të 14 mijë eurove

Një fenomen mjaft shqetësues janë bërë vjedhjet e shpeshta nëpër banesa e shtëpi, në fshatra e qytete të ndryshme. Së fundmi janë bërë publike disa raste të vjedhjeve të shumave të majme të parave të gatshme nga shtëpitë e kosovarëve. Një rast i tillë është denoncuar edhe mbrëmjen e kaluar në Podujevë, raporton Gazeta Sinjali.

Pronari i një shtëpie në rrugën ‘Ibrahim Demolli’ ka bërë të ditur për Policinë se dikush ka hyrë me forcë brenda shtëpisë së tij ku kanë arritur që të vjedhin një sasi të konsiderueshme të parave të gatshme si dhe stoli ari.

Sinjali mëson se bëhet fjalë për shumën prej 5 mijë eurove si dhe stoli ari në vlerë të 14 mijë eurove. Sipas pronarit, hajnat kanë depërtuar brenda shtëpisë përmes dritares.

Njësitet policore kanë dalë në vendin e ngjarjes ku kanë kryer ekzaminimet e nevojshme, teksa me urdhër të prokurorit rasti është iniciuar ‘Vjedhje e rëndë’.