Guti “kërcënon” Zidanin (Foto)

José María Gutiérrez Hernández, i njohur si Guti, ka bërë të ditur se synimi i tij është që një ditë të zë vendin e Zinedine Zidane, të bëhet trajner i ekipit të parë të Real Madridit, transmeton Gazeta Express.

Guti aktualisht është trajneri i grupmoshave të reja, Real Madrid U19, me të cilin shkroi histori – duke fituar Ligën, Kupën e Kampionëve dhe Kupën e Mbretit për herë të parë në shitori.

Sido që të jetë, Guti thotë se ëndrra e tij ka kohë për t’u bërë realitet, pasi e pranon se Zinedine Zidane është duke bërë punë të jashtëzakonshme dhe beson se ai duhet të qëndrojë në krye të Los Blancos edhe për shumë vite.

“Do të isha budalla nëse do ta mohoja se synimi im është që të drejtoj ekipin e parë”, u përgjigj Guti.

“Ajo se çfarë presim në Real Madrid është që Zidane të vazhdojë edhe për shumë vite të jetë trajner. Jemi krenar me punën që ka bërë dhe duhet të vazhdojmë të rritemi. Zidane është një shembull për mua. Synimi i të gjithëve është ekipi i parë”, shtoi më tej Guti. /Gazeta Express/