Grenell i reagon pushtetit pas goditjes së Konjufcës ndaj Biden: Pse nuk u ankuan më parë?

“Ka kohë edhe dy muaj”, pati thënë Kryeministri i Kosovës, Albin Kurti, kur u pyet rreth ardhjes së Administratës së Donald Trump.

Dy muaj më vonë e pas dy ditësh nga inaugurimi i Donald Trump, erdhi edhe ‘kritika’ e parë nga Emisari Presidencial për Misione të Posaçme (ku përfshihet edhe Kosova), Richard Grenell.

Shkak u bë një deklaratë e kryetarit të Kuvendit të Kosovës, Glauk Konjufca, i cili fajësoi Administratën Obama (me zv/president Joe Biden) dhe Administratën Biden, se “kanë vendosur Kosovën në pozitë të disfavorshme ndaj Serbisë”.

Grenellit s’iu deshën as dy ditë që nga kthimi në pushtet atje që t’i drejtohet qeverisë kosovare – me të cilën marrëdhëniet në vitin 2020 i kanë lënë thellësisht të lënduara.

“Këta shpenzuan katër vite duke komplimentuar Joe Biden-in dhe duke marrë pjesë në konventa dhe festa të tyre. Pse nuk u ankuan më parë?”, shkroi Grenell në “X”.

Javë më parë në një prononcim për Nacionale”Grenell konstatoi se “për herë të parë në 35 vite” të marrëdhënieve Kosovë-ShBA relacionet qeveria e Albin Kurtit i shndërroi në “partizane” dhe “në krizë”.

Kjo pasi Kurti qysh prej 2020-ës kishte marrë anë dhe bërë thirrje të votohet Joe Biden si dhe në vitin 2024 kishte marrë pjesë në Konventën e Demokratëve ku po nominohej Kamala Harris si kandidate për Presidente të ShBA-së nga radhët e demokratëve.