Gratë e Podujevës ftohen të aplikojnë për trajnime dhe grante në sektorin e përpunimit

Komuna e Podujevës dhe organizata “Iniciativa për Zhvillimin e Bujqësisë së Kosovës” (IADK), kanë ftuar të gjitha gratë/vajzat që jetojnë në vise rurale të aplikojnë për trajnime dhe grante në sektorin e përpunimit. Projketi, sipas zyrtarëve komunalë, përfshin tri programe: Konservues i frutave, perimeve dhe të ngjashme; Pëpunues i qumështit; dhe Përgatitës ëmbëlsirash.

“Për vitin 2023 aktiviteti për trajnime profesionale dhe grante do të përshijë Komunën e Podujevës duke përzgjedhur një grup prej 15 gra/vajza të cilat do të përcjellin programin e trajnimeve teorike dhe praktike në sektorin e përpunimit, përkatësisht njërin nga programet: konservues i frutave, perimeve dhe të ngjashme; qumështar; dhe bërës ëmbëlsirash”, thuhet në njoftimin e IADK-së të publikuar nga Komuna e Podujevës.

Sipas të njëjtit, IADK në bashkëpunim dhe bashkëfinancim me Komunën e Podujevës do të investojnë në trajnimin e grupit të grave për të rritur njohuritë e tyre në sektorin e përpunimit, të cilat do të pajisen me certifikata për aftësim profesional.

“Përveç zhvillimit të aftësive, projekti do të parashikojë komponentën e gjenerimit të të ardhurave për kandidatët më të suksesshëm nga ato që kanë përfunduar trajnimin dhe janë certifikuar. Në kuadër të këtij aktiviteti do të ngritet një njësi përpunuese me një investim në vlerë prej 9 mijë euro. Andaj, ftohen gratë/vajzat të aplikojnë për vijimin e njërit nga programet trajnuese për përpunimin e frutave dhe perimeve, përpunimin e qumështit pse përgatitjen e ëmbëlsirave, ku pas prëfndimit të trajnimeve dhe certifikimit do të aplikojnë për njësinë përpunuese”, thuhet në njoftim.

Sipas Organizatës “Iniciativa për Zhvillimin e Bujqësisë së Kosovës” (IADK) projekti “Përmirësimi i punësimit dhe mundësive për gjenerim të të ardhurave në zonat rurale të Kosovës” është trevjeçar (2023-2025), dhe përkrahet nga donatori (Bread for the World) nga Gjermania./KOHA net/N.T./