Gjykatësja në trajnim zyrtar, shtyhet shqyrtimi gjyqësor për rastin e vrasjes në Podujevë

Është anuluar seanca e paraparë të mbahej të premten në Gjykatën Themelore në Prishtinë, në rastin ku vëllezërit Fejard dhe Sedat Llugaliu akuzohen për vrasje të rëndë, pasi pretendohet se e kanë privuar nga jeta, tani të ndjerin Fahri Bunjakun.

Shkak për dështimin e shqyrtimit gjyqësor ka qenë pjesëmarrja e gjykatëses së rastit, Valbona Musliu-Selimaj, në një trajnim zyrtar, për të cilin zyrtarja ligjore tha se është obligativ, raporton “Betimi për Drejtësi”.

Tutje, u bë e ditur se për anulimin e seancës të së premtes, gjykatësja Musliu-Selimaj i kishte njoftuar me kohë edhe palët në procedurë, si dhe kishte revokuar urdhëresën për sjelljen me detyrim të të akuzuarve Llugaliu, nga Qendra e Paraburgimit në Lipjan.

Për këtë vrasje, i akuzuar është edhe vëllai tjetër i dy të akuzuarve të lartpërmendur, Esat Llugaliu, mirëpo ndaj tij është veçuar procedura, pasi në natën kur ka ndodhur ngjarja, ka pësuar lëndime trupore të rënda me pasoja të përhershme për shëndetin.

Seanca e radhës për këtë rast u caktua të mbahet më 21 nëntor, me fillim në ora 9:00.

Sipas aktakuzës, më 7 shkurt të vitit 2016, rreth orës 21:40 minuta, në rrugën e “Xhamisë” në Podujevë, pas marrëveshjes paraprake mes të pandehurve dhe personave NN, me dashje që ta privojnë nga jeta tani të ndjerin Fahri Bunjaku, nga hakmarrja për shkak të konflikteve të mëhershme të familjes Lugalliu dhe Bunjaku rreth biznesit, duke rrezikuar edhe Arafat Fetën, të pandehurit u kanë dal në pritë Fetës dhe Bunjakut.

Sipas aktakuzës, Esat Llugaliu, ka shtënë në drejtim të tyre me pistoletë dhe bashkë me të kanë shtënë edhe personat NN dhe të pandehurit Fejard dhe Sadat Llugaliu që kanë dal nga vetura e tyre, kurse personat NN kanë qene të fshehur në qoshe të një ndërtese.

Për të shpëtuar nga të shtënat me armë, aktakuza thotë se Feta ka dal nga vetura dhe ka ikur, kurse, tani i ndjeri Fahri Bunjaku është qëlluar me armë zjarri dhe në atë gjendje ka dal nga vetura, por pasi të shtënat nuk janë ndalur në vetëmbrojtje ka shtënë në drejtim të tyre dhe ka ikur drejtë shtëpisë së të dëmtuarit Halit Kika.

Ndërkohë, Esat Llugaliu, sipas aktakuzës, ka mbetur i plagosur në vendin e ngjarjes, kurse  Fejard dhe Sadat Llugaliu kanë ndjekur atë duke shtënë në drejtim të tij dhe në bashkëkryerje bashkë me personat NN, e kanë goditur me shkopinj druri dhe bisht të sëpatës.

Bunjaku, sipas aktakuzës, pas plagëve të marra ka rënë në oborrin e Halit Kikës, ku ka arritur Ilir Cakaj, i cili është munduar t’ia jap ndihmën e parë, dhe më pas është dërguar në QMF në Podujevë, e prej aty në QKUK në Prishtinë, po pasi nuk ka mundur t’u mbijetojë plagëve ka ndërruar jetë. /Betimipërdrejtësi