Gjykata në Podujevë “e qetë” që pas shfaqjes së koronavirusit, Komuna kërkon që masa e karantinës të reduktohet nga tre fshatra në vetëm një

Mbikëqyrësi i Gjykatës Themelore në Prishtinë, dega në Podujevë, gjykatësi Gazmend Bahtiri ka njoftuar të enjten se nuk ka asnjë çështje të natyrës urgjente që është trajtuar gjatë këtyre ditëve nga gjykatësit kujdestar.

Gjykatësi Bahtiri, për “Betimin për Drejtësi”, ka bërë të ditur se Gjykata e Podujevës nuk ka pranuar asnjë rast të natyrës urgjente, që nga vendimi i Këshillit Gjyqësor të Kosovës (KGJK) për reduktimin e aktiviteteve të gjykatave dhe degëve të tyre.

I njëjti ka shtuar se është në detyrën e stafit administrativ kujdestar t’i pranojnë rastet urgjente, mirëpo deri më tani nuk ka pasur të tilla.

Mbikëqyrësi Bahtiri, për “Betimi për Drejtësi” ka shtuar se do të bashkëpunoj dhe do të njoftoj në rast se do të ketë çështje të trajtimit urgjent në këtë gjykatë.

Masa mbrojtëse nga koronavirusi ka marrë edhe Komuna e Podujevës, duke pasur parasysh se tre fshatra të kësaj komune janë karantinuar.

Tutje, Komuna e Podujevës gjegjësisht Komisioni komunal për veprime dhe masave parandaluese e mbrojtëse nga COVID-19, ka mbajtur takim dje me 18 mars, ku është shqyrtuar situata dhe zbatimin e masave mbrojtëse, pas konfirmimit të dy rasteve të personave të infektuar me koronavirus, pikërisht në këtë komunë.

Në takimin e mbajtur të mërkurën nga Komisioni komunal për veprime dhe masave parandaluese e mbrojtëse nga Covid-19, sipas raportit të publikuar në faqen zyrtare të Komunës së Podujevës, është thënë se veprohet në përputhje me vendimin Qeverisë së Republikës së Kosovës dhe rekomandimet e Instituti Kombëtar i Shëndetësisë Publike (IKSHPK), për ndërmarrjen e masave preventive.

Më tej, ky raport tregon se ekipi mjekësor i Qendrës Komunale të Mjekësisë Familjare (QKMF) në Podujevë, po mbanë kontakt të vazhdueshëm me familjen e prekur nga pandemia.

Nga ky takim dhe raporti i publikuar i këtij takimi mësohet se kemi të bëjmë me personin e tretë, të dyshuar me koronavirus i të njëjtës familje, i cili është shoqëruar për në QKMF.

Duke qenë se është e ditur që tashmë 3 fshatra janë në karantinë, që nga paraqitja e rastit të parë në Podujevë, thuhet të jetë shqyrtuar mundësia e reduktimit të karantinës vetëm në fshatin ku gjendet familja me të prekurit nga pandemia.

“Pas konfirmimit të rastit me koronavirus, me vendimin e Qeverisë në fshatrat Dumnicë e Poshtme, Dumnicë e Epërme dhe Llaushë, po aplikohet masa e karantinës. Ndërsa, në takimin e sotëm të Komisionit u kërkua nga Qeveria të shqyrtojë mundësinë që masa e karantinës të reduktohet vetëm në fshatin ku është familja me anëtarët e prekur nga COVID-19”, vazhdon raporti i komisionit në fjalë.

Ky komision ka bërë të ditur edhe faktin se inspektorët komunalë vazhdimisht janë në terren dhe po përcjellin zbatimin e vendimit të qeverisë, për mbylljen dyqaneve dhe lokaleve hoteliere.

Ndryshe, mbrëmë, është informuar opinioni për rastin e tretë pozitiv me Covid-19 në Komunën e Podujevës, ku e infektuara thuhet të jetë një grua mbi moshën 50 vjeçe nga fshati Bradash, rast ky që e ka dërguar në 20 shifrën e të prekurve nga virusi global në Republikën e Kosovës. /BetimipërDrejtësi