Këtë propozim e ka dhënë prokurorja speciale Drita Hajdari, në seancën e së premtes, në të cilën është dhënë fjala përfundimtare në këtë proces gjyqësor, që ka filluar në korrik të vitit 2016. Prokurorja Hajdari, gjatë këtij shqyrtimi gjyqësor, deklaroi se ka bërë ndryshimin e aktakuzës duke larguar faturën e dytë lidhur me kontratën për përkthimin e librave nga gjuha angleze në atë shqipe.

Ndërkohë, shpallja e aktgjykimit në këtë rast ishte caktuar për nesër, më 18 tetor, mirëpo është shtyrë për afat të pacaktuar, shkruan Gazeta Express.

Prokuroria Speciale e Republikës së Kosovës, pretendon se Enver Hasani në cilësinë e rektorit të UP’së, Haki Veliu në cilësi të shefit të Zyrës së Prokurimit në UP dhe Albert Ragipi në cilësi të drejtorit të Institutit për Studime Ndërkombëtare (ISN) me qëllim të përfitimit të kundërligjshëm pasuror për këtë institut, kishin falsifikuar kontratën origjinale lidhur me përkthimin e disa librave nga gjuha angleze në atë shqipe.

Sipas aktakuzës, të njëjtit kishin hartuar edhe një kontratë të re, duke shfrytëzuar numrin e njëjtë të protokollit nga kontrata origjinale.

Sipas kontratës origjinale, vlera e saj kishte qenë 500.000 euro, përkatësisht çmimi i pagesës për njësi 1000 fjalë 12.65 euro e stipuluar me nenin 17, ndërsa në kontratën e re sipas prokurorisë, kjo pjesë është ndryshuar në 1000 karaktere për 12.65 euro./GazetaExpress/