Gjenerali Mattis: Sulmi ushtarak i kroatëve ndaj serbëve po studiohet në Amerikë (Foto)

Ministri i Mbrojtjes së Kroacisë, Damir Krsticevic, ishte për vizitë në Ëashington ku u takua me homologun e tij amerikan, James Mattis.

Gazeta kroate ‘Jutarnji List’ raporton se në këtë takim, ndër të tjera, u bisedua edhe për operacionin që kishte kryer ushtria kroate ndaj forcave serbe gjatë luftës më 1995, që njihet me emrin ‘Operacioni Stuhia’.

Gjenerali amerikan citohet t’i ketë thënë ministrit kroat se ‘Stuhia’ ishte një operacion ushtarak shembull që po studiohet edhe në shkollat ushtarake të Amerikës, transmeton gazetametro.net

“Së shpejti do të mbushen 22 vjet nga operacioni, që njihet si Stuhia. Ishte një operacion që po studiohet këtu në Amerikë dhe që tregon se forcat ushtarake të drejtuara e të pajisura si duhet mund ta kthejnë përmbys situatën”, citohet të ketë thënë Mattis gjatë takimit, teksa riafirmoi afërsinë e dy shteteve si aleate.

Operacioni ‘Stuhia’ konsiderohet si beteja që ia fitoi luftën Kroacisë ndaj serbëve, betejë që pati impakt të madh edhe në territorin boshnjak dhe në tërë luftën e Kroacisë për  pavarësi. Pas operacionit në fjalë, Kroacia kishte rimarrë kontrollin e një territori të madhësisë së përafërt me Kosovën.

Sipas gazetës kroate, një tjetër temë me rëndësi që u diskutua ishte edhe ajo e interesimit të Kroacisë për të blerë aeroplanë luftarakë amerikanë.

“Kemi pritur shumë për këtë gjë dhe tash mora mbështetjen e gjeneralit Mattis për këtë projekt. Jemi më afër blerjes së avionëve amerikanë, vendimin do ta marrim në fund të vitit”, tha ministri Krsticevic pas takimit. /gazetametro.net