Giacomo Nava, gardiani italian i Llapit

Në orët e vona të 7 janarit, skuadra e Llapit përmes rrjetit social Facebook, njoftoi për “transferimin e madh” të afatit kalimtar të janarit. Në mënyrë të ngjashme, pak a shumë, u mundua edhe ta prezantojë para publikut.

Fillimisht, njoftoi me shumë bujë për firmosjen e kontratës, e një orë më vonë, nxori edhe një video-xhirim ku shihej teksa përforcimi mbërriti në Podujevë, shkruan sot Koha Ditore.

Bëhet fjalë për portierin nga Italia, Giacomo Nava (194 cm). 22-vjeçari me ekipin elitar nga Kosova firmosi kontratë për një vit e gjysmë, duke u pajtuar të qëndrojë te Llapi deri në fund të edicionit 2020/21. Nava ishte startues në të gjitha miqësoret e Llapit dhe do të jetë i gatshëm për debutim në pjesën e dytë të Superligës së Kosovës, që nis këtë muaj (shkurt).

Nava te Llapi vlerësohet si siguri e madhe për portën, meqë në pjesën e parë, skuadra ishte në mesin e katër ekipeve që pranoi më së shumti gola. Llapi që mbylli pjesën e parë në pozitën e shtatë me 24 pikë, ka pranuar 29 gola, ndërkohë ka shënuar 26. Vetë Nava insiston se është i gatshëm të bëjë më të mirën që ekipi i tij i ri të mos pranojë shumë gola.

“Jam duke punuar shumë gjatë fazës përgatitore, në mënyrë që të jem plotësisht i gatshëm për rifillimin e kampionatit, ku shpresoj ta dëshmoj veten me paraqitje të mira. Shpresoj të jap më të mirën për ekipin, i cili ka ambicie këtë edicion”, ka thënë Nava, duke shtuar se dalja në Evropë për edicionin e ardhshëm mbetet synimi kryesor i Llapit.

Ka vetëm tri javë te Llapi, por Nava insiston se është adaptuar mirë si në ekip ashtu edhe me jetën në qytetin e Podujevës, duke thënë se të gjithë e kanë mirëpritur, si bashkëlojtarët ashtu edhe qytetarët.

“Edhe pse nuk kam pasur rastin të dal shumë nëpër qytet për shkak të angazhimeve, mund të them se qyteti është i mirë dhe me njerëz të mrekullueshëm. Po ashtu, edhe në ekip më kanë pritur shumë mirë dhe i falënderoj të gjithë për këtë mundësi, të cilën dua ta shfrytëzoj në mënyrën më të mirë të mundshme”, ka thënë Nava. “Gjuhën shqipe nuk e di, me përjashtim të disa fjalëve, por pasi kam kontratë me Llapin për një vit e gjysmë, dua t’i ndjek mësimet e gjuhës shqipe për t’u kuptuar mirë prej të gjithëve”.

Propozimi për ardhje në Kosovë

Por Nava nuk ka pasur problem që të kuptohet me bashkëlojtarët. Ai flet katër gjuhë dhe përdor atë se cila i përshtatet më shumë situatës, në mënyrë që të kuptohen të gjithë.

“Varësisht se kënd e kam përpara në zhveshtore dhe më duhet të merrem vesh, atëherë flas gjuhën që është më e përshtatshme. Kryesisht, po flas gjuhën angleze dhe atë spanjolle, ndonjëherë i përdori edhe ato fjalë të pakta që i di të gjuhës shqipe”, pranon Nava.

Ai prej shtatorit të vitit të shkuar ishte pa skuadër.