Gecaj tregon se kur do të nis themelimi i asociacionit

Me kthimin e Listës serbe në institucionet e Kosovës, themelimi i asociacionit të komunave me shumicë serbe, do të filloj të hartohet së shpejti, ka bërë të ditur për Indeksonline, Bajram Gecaj.

Zëvendësministri në Ministrinë e Administrimit të Pushtetit Lokal, ka thënë se pasi që përfaqësuesit e kësaj të fundit të kenë një takim javën e ardhme me Kryeministrin Isa Mustafa, gjithçka do të sqarohet sa i përket kohës se fillimit të themelimit të AKS-së.

“Tani lista serbe duhet të takohet me kryeministrin në mënyrë që kthimi i tyre të jetë i plotë, por për momentin Kryeministri Mustafa është jashtë vendit. Në fillim të javës së ardhshme kemi një takim me ta dhe do të verifikojmë se vërtet a janë kthyer plotësisht në gjitha institucionet, pastaj mund të merremi vesh me ta se kur do filloj hartimi i statusit të asociacionit të komunave me shumice serbe, sepse siç kemi thënë edhe më herët parakusht që të filloj kjo punë është dashur që Lista serbe të kthehet në institucione”, ka thënë Gecaj.

Gecaj ka shpjeguar se procesi i themelimit të Asociacionit do të marrë kohë deri në finalizimin e tij, proces i cili është çështje e brendshme e Kosovës dhe si e tillë duhet të kryhet.

Ai ka thënë se asociacioni do të jetë në përputhshmëri të plotë me vendimin e gjykatës kushtetuese. /Indeksonline/