GAP: Shpejtim Bulliqi ka arritur t’i përmbush 8 nga 61 premtimet e bëra

Tre kryetarë të komunave të rajonit të Prishtinës: Podujevë, Fushë-Kosovë dhe Obiliq, kanë arritur të përmbushin vetëm 12 nga 165 premtimet e bëra gjatë fushatës zgjedhore të vitit të kaluar.

Për periudhën janar-qershor 2022, sipas GAP-it, kryetari i Komunës së Podujevës, Shpejtim Bulliqi (LVV), ka arritur t’i përmbush 8 nga 61 premtimet e bëra, Xhafer Gashi (LDK) i Obiliqit i ka përmbushur 3 nga 69 premtime, kurse kryetari i Fushë-Kosovës, Burim Berisha (LDK) ka realizuar vetëm 1 premtim nga 35 sa i ka bërë gjithsej.

Bazuar në platformën “Letërnjoftimi i komunave” i Institutit GAP, Shpejtim Bulliqi deri më 30 qershor i ka edhe 5 premtime gjysmë të përmbushura, 18 i ka filluar, kurse 30 nuk i ka filluar ende. Prej premtimeve të përmbushura 4 janë në fushën e arsimit dhe nga 1 në bujqësi, kulturë, shëndetësi dhe sport.

Premtime gjysmë të përmbushura i ka nga një në fushën e arsimit, infrastrukturë, kulturë, shëndetësi dhe shërbime publike. Kurse të filluara janë një premtim në administratë, pesë në arsim, një në bujqësi, tri në infrastrukturë, një në kulturë, dy në shëndetësi dhe pesë në shërbime publike.