Flasin nga VV’ja: Tregojnë se a do të ketë sot takim me LDK’në

Përfundimi i takimit të djeshëm midis dy partive fituese në zgjedhjet e përgjithshme që u mbajtën më 6 tetor, Lëvizjes Vetëvendosje dhe Lidhjes Demokratike e Kosovës, përfundoi me mosarritje të marrëveshjes për koalicion qeverisës.

Pas takimit të djeshëm këto dy subjekte politike dolën me deklaratat e tyre sa i përket vazhdimit të negociatave për arritjen e kësaj marrëveshje.

Gazeta Metro mëson se takim të ri midis VV’së dhe LDK’së nuk do të ketë gjatë ditës së sotme, ndërkaq për nesër, më 16 dhjetor, nuk është caktuar ende se a do të zhvillohet takimi i radhës.

‘Për sot nuk është paraparë ende ndonje takim, ndërkaq për ato të ditëve të radhës do të informohemi me kohë’, kanë thënë burimet e Metros brenda VV’së.

Mosarritja e kësaj marrëveshje për koalicionin e shumëpritur qeverisës, midis VV’së dhe LDK’së, ka bërë të reagojnë edhe ndërkombëtarët.

Së fundmi kongresisti amerikan, Eliot Engel ka komentuar për zhvillimet e fundit politike në Kosovë, duke bërë thirrje që të krijohet Qeveria e re sa më parë.

‘Sa më tepër që të zvarritet formimi i qeverisë, armiqtë e Kosovës e kanë më të lehtë të minojnë mbarëvajtjen e Kosovës. Rri me shpresë dhe pres që partitë fituese të formojnë koalicionin sa më shpejt, të tregojnë që Kosovë është shtet demokratik’, ka thënë Engel.

Kujtojmë se këto dy subjekte politike kanë për qëllim finalizimin e marrëveshjes për krijimin e Qeverisë së re, por siç raportohet, barrikadimi i kësaj marrëveshje po vazhdon të jetë për shkak të insistimit të LDK’së në postin e presidentit.

VV-LDK tash e një kohë të gjatë janë duke negociuar përmes ekipeve të tyre për arritjen e koalicionit për formimin e Qeverisë së re, që pritet të ndodhë së shpejti.