Fituesi i 27 kontratave nga qeverisja e Veliut, shpërblehet me miliona edhe nga ‘Administrata Bulliqi’

Dikur akuzohej Agim Veliu se si ka mundësi që një kompani të marr 27 tender për 20 muaj në komunën e Podujevës e që përfshinin miliona euro, transmeton PodujevaPRESS.net

Tani e njëjta kompani po vazhdon me fitimin e tenderëve në komunën e Podujevës nën qeverisjen e Shpejtim Bulliqit. Kjo kompani brenda dy vitesh ka fituar mbi 2 milion euro nga kjo komunë.

Bëhet fjalë pra për kompanin NNT Bini Sh.P.K.

Kompania figuron në pronësi të afaristit Afrim Hajdari, një votues të deklaruar publikisht të Lidhjes Demokratike.

Kjo kompani vetëm në pesë (5) muajt e pare të vitit 2023 ka fituar hiq më pak se shtatë (7) tenderë në Podujevë, e që vlera e përgjithshme eshtë afër 1 milion e gjysmë euro.

Siç mund ta shihni edhe nga publikimi i bërë në faqen e Komisionit Rregullativ të Prokurimit Publik kompania Bini ka fituar tenderë me vlerë 1,405,528 €.

Në faqen e ARBK-së kjo kompani është regjistruar në vitin 2019 me 3 punëtor dhe me një kapital prej 1,200,000.00 €.

Edhe një vitin 2022 kjo kompani ka fituar 11 tenderë në Podujevë me vlerë 754,481 €.

Ditëve në vijim PodujevaPRESS do të bëjë publikimin edhe të kompanive tjera që kanë fituar tenderë milionësh në Komunën e Podujevës.

Gjatë vitit 2021 në garën për kryetar komune kandidatët kishin akuzuar Agim Veliun se si ka mundësi që në Podujevë ka fituar 27 tenderë për 20 muaj një kompani.

Naim Fetahu kishte deklaruar se “një kompani në Podujevë i merr 27 tenderë për 20 muaj, vetëm pse është anëtar i LDK-së. Disa herë ka konkurruar si ndërmarrje e vetme, sepse ka humbur besimi se ndërmarrjet tjera munden me fitu. Është fjala për kompaninë “N.N Bini””, ka thënë Fetahu në RTV Dukagjini.

Pronari i kompanisë “Bini”, Afrim Hajdari nuk e ka mohuar se është votues i LDK-së. Hajdari kishte dhënë një prononcim për Kallxo dhe kishte thënë se jam me LDK-në.

“Unë nuk jam zyrtar në parti, s’kam pozitë. Normal që e kam votu LDK-në, si krejt Llapi. Absolutisht hiç asnjë ndihmë se kam. Në komunën e Podujevës ma shumë fitojnë firma të qyteteve tjera se të Podujevës”, pati thënë ai.

E njëjta kompani, “N.N.N. Bini” kishte përfituar 27 tenderë brenda 20 muajve në periudhën ‘Prill 2018 – Dhjetor 2019’, me vlerë totale rreth 1 milionë e 850 mijë euro.

Siç kishte raportuar Kallxo.com në janar të vitit 2020, në disa prej këtyre tenderëve, kompania “Bini” ka qenë kompania e vetëm që ka aplikuar edhe pse natyra e punës ka qenë ndërtimi i kanalizimeve dhe zgjerimi i lumit. Madje, në disa tenderë Komuna e Podujevës i kishte eliminuar kompanitë e tjera që kanë ofertuar, duke e lënë të vetme në garë kompaninë Bini, shkruante Kallxo.com.

Pronari i kompanisë, Afrim Hajdari kishte se arsyeja se pse kompania e tij i ka fituar 27 tenderë në periudhën 20 mujore është se ai oferton me çmim të ulët dhe se nuk ka ndonjë arsye tjetër.

“Çdo tender që e kam marrë, e kam marrë me çmimin me të ulët. E vetmja arsyeja që i kam fitu është çmimi më i ulët”, kishte thënë ai.