Fillon rrënimi i 48 objekteve pa leje pranë Liqenit të Batllavës (Foto/Video)

Ushtruesi i detyrës së ministrit së Ambientit dhe Planifikimit Hapësinor, Fatmir Matoshi, tha se pas dhënies së urdhrit për largimin e objekteve pa leje pranë liqenit të Batllavës ka nisur këtë aksion dyditor me qëllim që të ruajnë cilësinë e resurseve ujore në vend.

Matoshi shtoi se nuk do bëjnë asnjë lëshim dhe të gjitha objektet do t’i rrënojnë sepse ato janë pa leje ndërtimore.

“Jemi në aksion për të zbatuar vendimin e Ministrisë së Ambientit, të Inspektoratit për të ruajtur cilësinë, vlerat ujore tona këtu në liqenin e Batllavës. Gjatë ditës do të ketë një operacion që fillon sot dhe do të vazhdojë edhe nesër… Nuk do të ketë asnjë përkushtim të vetëm për asnjë person, kushdo qoftë ai, nga 48 objekte të identifikuara tashmë kanë vendim për largimin e objekteve të tyre nga afërsia e liqenit, kjo është zonë e mbrojtur, këto objekte që janë të vendosura këtu shumica prej tyre janë në vende të uzurpuara, janë të gjitha pa leje ndërtimore”, tha ai.

Matoshi u shpreh i bindur se do të hasë në mirëkuptim nga pronarët e objekteve.

Aksioni është kryer nën përcjelljen e edhe të Njësisë Speciale të Policisë së Kosovës. Në lidhje me vendimin e Ministrisë së Mjedisit dhe Planifikimit Hapësinor disa nga pronarët e objekteve nuk u pajtuan.

Hajrullah Hasani, pronar i një objekti tanimë të rrënuar, tha se pajtohet me vendimin e Qeverisë, por që, sipas tij, po i bëhet e padrejtë pasi që toka ku e kishte të vendosur vilën ishte e tij.

“Në vitet e 60-ta është marrë në kohën e Rankoviqit dhe të gjithë këta fshatarë janë të dëmtuar në pikën më të mundshme… Tani përfundi rrugës i vetmi unë, i kam 28 ari nga Gjyqi i Qarkut, të vërtetuara edhe lëndën në gjyq që nuk m’u kanë paguar kurrë dhe kam menduar që kam më shumë të drejtë se secili, por shteti ka marrë vendim unë pajtohem me atë”, ka thënë ky pronar.

Disa pronarë të objekteve tjera kërkuan kohë edhe për disa ditë, derisa u ankuan se nuk kanë pasur mundësi për ankesë.

Kurse kryeinspektori i Ministrisë së Mjedisit dhe Planifikimit Hapësinor, Bedri Halimi, iu dha atyre kohë tre ditë për t’i larguar gjërat më me vlerë, derisa theksoi se do të veprojnë njësoj me të gjithë.

“Ajo që do të bëhet me 47 të tjerë do të bëhet edhe me ju 48-in… Po ti a i shikon dokumentet a vetëm hajt… Ne dokumentet i kemi shikuar, përgjigjen ua kemi dhënë… As ankesa nuk kena pranuar as kurrfarë përgjigje nuk keni dhënë… ankesa nuk keni bërë në Ministri ne vazhdojmë aksionin sipas planit tonë”, u shpreh ai.

Halimi ka ftuar edhe institucionet tjera përgjegjëse që të jenë pjesë e këtij aksioni.

Përveç Policisë, në aksionin e rrënimit kanë marrë pjesë edhe njësitet e zjarrfikësve, KEK-u. Kujtojmë se para një muaji Ministria e Mjedisit dhe e Planifikimit Hapësinor u ka dërguar vendim për largimin e vilave dhe tarracave pa leje.