FFK i ‘godet’ nacionalistët shqiptarë, sqaron se si duhet të quhet Kosova – Përfaqësuese apo Kombëtare

Njëra ndër gjërat më të paqarta sa i përket ekipit të futbollit të Kosovës, mbetet edhe se si duhet të quhet ajo.

Disa e thërrasin përfaqësuese e tashmë dikush ka filluar ta konsideroj kombëtare.

Për ta sqaruar këtë situatë, Periskopi ka kontaktuar me zëdhëndësin e FFK-së, Fazli Berisha, i cili ka dhënë një përgjigje definitive se si duhet ta thërrasim tash e tutje Kosovën.

Komentatorët e futbollit janë bërë konfuz në lidhje me cilësimin e kombëtares, me disa që e quajnë kombëtare dhe të tjerë që e quajnë përfaqësuese. Si i referohet kombëtares FFK-ja?

Berisha tha se të dyja fjalët janë shqip, por në dokumentat e FIFA-së Kosova quhet ‘National Team’, pra Kombëtare.

”Shikoni edhe njëra dhe tjetra janë shqip, por nëse themi në gjuhën angleze “National Team” i bie se ekipi kombëtar dhe ne tash e sa kohë e quajmë Ekipi kombëtar. Ndërsa nëse themi Përfaqësuese e ka domethënien “Reprezentacioni” dhe në dokumentet e UEFA-s e FIFA-s e kemi “National Team”, – sqaroi ai.