Fadil Vokrri: Po, Champions League në Kosovë!

UEFA edhe zyrtarisht e ka pranuar stadiumin e Mitrovicës “Adem Jashari” si vend për t’i organizuar ndeshjet si vendase të klubeve të Kosovës që do të garojnë në Ligën e Kampionëve dhe në Evropa Ligë.

Lajmin për Indeksonline e ka konfirmuar kryetari i Federatës së Futbollit të Kosovës, Fadil Vokrri.

Numri një i FFK-së ka thënë se stadiumi “Adem Jashari” do të jetë “vatër” e skuadrave të Kosovës në garat Evropiane.

Në këtë stadium, Kosova ka zhvilluar dy ndeshje miqësore në kohën kur FFK nuk ishte e pranuar me të drejta të plota në FIFA dhe UEFA.

Mirëpo organizimi i ndeshjeve në këtë impiant u ndalua nga shtëpia e futbollit evropian me faktin se qyteti i Mitrovicës nuk ofron siguri të nivelit të lartë që nevojitet për të organizuar një ndeshje ndërkombëtare.

Këtë fakt skuadrat kosovare e vuajtën pasi që nuk iu lejua të marrin pjesë në ndeshjet kualifikuese të ligave evropiane për sezonin 2016/17.

Kryetari i FFK-së tha se tani organet e futbollit të Kosovës e kanë bindur UEFA-në në lidhje me sigurinë e stadiumit dhe klubet janë të lira të tregojnë potencialin e tyre në Evropë.

Kujtojmë se Feronikelit dhe Hajvalisë iu mohua e drejta e garimit në Evropë shkaku i mungesës së një stadiumi për të zhvilluar ndeshjet si vendas. /IndeksOnline/