“Është shkëputur kontrata e qirasë me AAK-në”, dokumenti që tregon se afati ishte deri më 2026 dhe njoftimi të bëhej tre muaj përpara

Ministri i Bujqësisë, Pylltarisë dhe Zhvillimit Rural, Faton Peci ka thënë se sot ka autorizuar sekretarin e Ministrisë për ndërprerjen përfundimtare të qerasë ku ndodhen zyrat e Aleancës për Ardhmërinë e Kosovës. Siç tha ai kontrata me AAK-në është shkëputur përfundimisht, për shkak të mungesës së mirënjohjes dhe korrektësisë në komunikim.

“Me revidimin e kontratës ka qenë edhe mundësi që të rikthejmë rreth 600 metra katrorë dhe me qenë se kemi qenë shumë korret dhe gjeneroz, dhe me qenë se ata kanë pasuar me jomirënjohje dhe jokorrektësi në komunikim me Ministrin e Bujqësisë, sot ne mëngjes Ministria ka marr vendim që përfundimisht të shkëputet tërësisht kontratën me Aleancën për Ardhmërinë e Kosovës”, tha Peci për Ekonomia Online.

Mirëpo, në dokumentin e siguruar nga Gazeta Online Reporteri.net, në nenin 2 të kësaj kontrate thuhet se qiramarrësi mund t’i shfrytëzojë këto zyre deri më 30 shtator të vitit 2026, e poashtu me mundësi ndërprerje tre muaj para skadimit të kontratës.

“Qiramarrësi fillon shfrytëzimin e parcelës nga neni 1 i kësaj kontrate në formë të qiradhënies, duke filluar nga data 1 tetor 2023, deri më 30 shtator 2026, me mundësi ndërprerje tre (3) muaj para skadimit të afatit të kontratës”, thuhet në nenin 2 të ksaj kontrate mes Ministrisë së Pylltarisë dhe AAK-së.

Poashtu edhe në nenin 7 të kontratës është e theksuar se pala që dëshiron shkëputjen e kontratës duhet që 180 ditë para të paraqesë formën me shkrim.

“Pala e cila dëshiron shkëputjen e kontratës është e obliguar që në afat prej 180 ditësh, paraprakisht të paraqes kërkesën në formë të shkruar për shkëputjen e kësaj kontrate”, thuhet në nenin 7 të kontratës mes të dyja palëve.

Ministri Peci, të premtën e 15 marsit kishte paralajmëruar përmes një postimi në Facebook, ka thënë se Ministria që ai drejton ka kthyer 600 metra katrorë në shërbim të dikasterit që ai udhëheqë, e që bëhet fjalë për hapësirën në Lagjen Ulpiana.

“Shihemi të hënën! Unë punoj edhe çdo fundjavë por duke qenë se kaloi orari i punës së administratës, shihemi të hënën! Ju uroj një fundjavë të qetë! P.s: Qytetarët më së miri e vlerësojnë përmes këtyre fotografive se kush janë manipulantët dhe matrapazët!”, kishte shkruar Peci, ndaj të cilit kishte reaguar drejtori i Zyrës për Media në AAK, Lulëzim Blaka.

Blaka i kishte thënë të premten ministrit Peci “mirë se vjen o trim”, dhe se do të presin siç është zakoni./Reporteri.net/