Endrita Murati: Komuna e Podujevës po vazhdon me keqpërdorimin të buxhetit

Në mbledhjen e sotme të kuvendit Komunal të Podujevës, u prezantua edhe Raporti i Zyrës Kombëtare të Auditimit për Komunën e Podujevës për vitin financiar të përfunduar më 31 dhjetor 2019 si dhe Planin e veprimit për zbatimin e rekomandimeve të dhëna në Raportin e Auditimit.

E lidhur me këtë ka reaguar asambleistja nga radhet e PDK në Podujevë Endrita Murati.

Murati tha sot gjatë séances se raporti i Auditimit për Pasqyrat Financiare të Komunës së Podujevës, edhe këtë vit del të jetë brenda trendit tërësisht negativ që e ka përcjellë komunën edhe nga vitet e kaluara. Refuzimi për të krijuar një sistem të brendshëm llogaridhënës të menaxhimit të burimeve e resurseve financiare të komunës, flet për mungesë totale të vullnetit për të menaxhuar drejt me pasuritë e komunës. Me fjalë të tjera, parregullësitë që i kemi parë e lexuar edhe këtë vit në këtë raport, për shkak se janë të përsëritura, qartazi janë lejuar nga kreu i ekzekutivit të Komunës. Nuk mund të ketë shpjegim tjetër për një gjë të tillë kur shihet qartë që natyra e shkeljeve të ligjit e veprimeve abuzive veç sa shkon duke u thelluar.

Nuk është absolutisht e rëndësishme që, për këto çështje të evidentuara në Raportin e Zyrës Kombëtare të Auditimit, Komuna, përgjigjet shpesh në stilin se “I kemi zbatuar disa rekomandime nga raporti i një viti më parë”, kur dihet se për çdo vit, gjetjet, si për nga numri e si për nga natyra e shkeljeve janë gjithënjë në trend të përkeqësimit në raport me numrin e zbatimit të rekomandimeve.

Mungesa e zbatimit të dispozitave ndëshkuese disiplinore për zyrtarët që kryejnë shkelje, mungesa e vullnetit nga ana e organeve të ndjekjes penale për të hetuar akuzuar e gjykuar dëmet financiare në pothuajse shumicën e kategorive e programeve, po inkurajon papërgjegjësinë në menaxhimin e financave në Komunën e Podujevës.