Ekskluzive | Arrestohet një person në Podujevë, kërkohej për tentim vrasje

I riu nga Podujeva që kërkohej me urdhërarrest nga Policia, nën dyshimet për veprën penale vrasje në tentativë, ka rënë në prangat e Policisë të hënën. 28-vjeçari u prezantua fillimisht rrejshëm me dokumente të tjera, e më pas u kap edhe me armë, raporton Gazeta Sinjali.

Sinjali ka mësuar ekskluzivisht se i dyshuari që u arrestua është L. K, i cili tashmë është dërguar në mbajtje për 48 orë.

K. u prangos në rrugën “Zahir Pajaziti”, në Podujevë, ku Policia pas kontrollit policor ia gjeti edhe një armë zjarri, thikë dhe një sasi të narkotikëve.

Gjatë aksionit për arrestimin e tij, policia ka kryer kontrolle në lokalin ‘Rio Foods’, ku ka gjetur dhe sekuestruar një çantë me një shumë parash, armë, si dhe një motoçikletë. Për këtë rast, në arrati ndodhet një person i dyshuar, i cili nuk është kapur përkundër kërkimeve nga Policia.

Ndaj K, përveç hetimeve për rastin për të cilin ishte në kërkim, është iniciuar rast edhe për armëmbajtje pa leje dhe posedim të drogës.

Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.