Ekrem Hyseni premton mbështetje për zjarrfikësit: Heroizmi i tyre është i jashtëzakonshëm

Kandidati i LDK-së për kryetar të Komunës së Podujevës, Ekrem Hyseni, gjatë ditës së sotme ka vizituar zjarrfikësit e komunës, duke vlerësuar punën e tyre të palodhshme përkundër kushteve të rënda me të cilat po përballen.

Hyseni tha se zjarrfikësit po punojnë në mungesë të stafit dhe mjeteve të duhura, madje edhe ato pak pajisje që i posedojnë nuk janë në gjendje të mirë funksionale. Sipas tij, kjo nuk i ka ndalur ata që të jenë gjithmonë në krye të detyrës, sidomos gjatë këtij viti kur u përballën me një numër të madh zjarresh.

“As mungesa e stafit, as mungesa e mjeteve të nevojshme nuk i ndalë ata të jenë në krye të detyrës. Përkundrazi, pikërisht ballafaqimi me zjarre të shumta gjatë këtij viti ka dëshmuar përkushtimin e tyre të jashtëzakonshëm”, ka deklaruar Hyseni.

Ai gjithashtu është zotuar se në qeverisjen e tij, zjarrfikësit do të kenë mbështetje të plotë, duke e cilësuar këtë si një nga prioritetet e para.

“Brenda vitit 2026 do të shtojmë numrin e zjarrfikësve, do të sigurojmë shujtat dhe do të krijojmë dy pika të tjera të qëndrimit të përkohshëm gjatë verës, në mënyrë që bashkëpunimi me qytetarët të jetë më i lehtë”, ka shtuar ai.