Ekrem Hyseni: Injorimi i qytetarëve dhe problemeve të tyre merr fund më 12 tetor

Kandidati për kryetar të Komunës së Podujevës, Dr. Ekrem Hyseni, ka zhvilluar sot një takim me banorët e Lagjes së Dëshmorëve, ku ka diskutuar për nevojat dhe kërkesat e tyre të përditshme.

Në këtë takim, Hyseni ka theksuar se pushteti aktual i ka injoruar problemet reale të qytetarëve, por sipas tij, kjo qasje do të marrë fund pas zgjedhjeve të 12 tetorit.

“Injorimi i problemeve konkrete, sikurse edhe i vet qytetarëve nga pushteti në ikje, do të marrë fund më 12 tetor,” ka deklaruar Hyseni.

Ai ka theksuar se vullnetin dhe përcaktimin qytetar për ndryshim nuk mund ta ndalë askush, duke theksuar se banorët e Podujevës kërkojnë një qeverisje të ndershme, transparente dhe afër njerëzve.

“Qytetarët tanë meritojnë një qeverisje që trajton dinjitetshëm çdonjërin prej tyre,” ka shtuar ai.

Sipas Hysenit, çdo lagje dhe çdo fshat i komunës do të trajtohet me barazi dhe respekt, duke u dhënë prioritet zgjidhjeve konkrete për infrastrukturën, shërbimet publike dhe zhvillimin ekonomik.