Edhe KBI në Podujevë e dënon sulmin e rëndë ndaj imamit Berisha

Bashkësia Islame e Kosovës në Podujevë ka reaguar ashpër dhe ka dënuar sulmin fizik ndaj imamit të xhamisë së fshatit Lupç të Komunës së Podujevës.

“Ne si Këshill i Bashkësisë Islame e dënojmë fuqishëm sulmin qyqarë ndaj punonjësit tonë ndërsa ftojmë organet e rendit që kryerësit e këtij akti të pa pranueshëm t’i vënë para drejtësisë”, thuhet ndër të tjera në reagim.

Reagimi i plotë:

KBI dënon fuqishëm sulmin ndaj imamit Zeqir Berisha

Zeqir ef Berisha, imam pranë KBI-Podujevë, është sulmuar rëndë mbrëmë nga disa persona, brenda ambienteve të xhamisë ku shërben si imam.

Me këtë rast, ne si Këshill i Bashkësisë Islame e dënojmë fuqishëm sulmin qyqarë ndaj punonjësit tonë ndërsa ftojmë organet e rendit që kryerësit e këtij akti të pa pranueshëm t’i vënë para drejtësisë.

Lidhur me rastin, KBI sot do të mbaj mbledhje të jashtëzakonshme.

Ftesë për disa medie:

Informoni drejtë opinionin dhe mos shtrembëroni deklaratat e zyrtarëve të KBI, gjoja se organet e sigurisë e kanë neglizhuar rastin!

KBI beson fuqishëm se policia jonë është duke e kryer detyrën ashtu siç është më së miri dhe se në mes dy institucioneve ka koordinim në nivelin më të lartë të mundshëm.