E kapi gruan për fyti pas një mosmarrëveshje, burri përfundon në ndalim policor

Dhuna në familje vazhdon të mbetet një nga damkat më të mëdha të shoqërisë kosovare. Çdo ditë në Polici raportohen raste ku gratë dhunohen në forma të ndryshme nga personat të cilët i kanë zgjedhur të ndajnë jetën me ta, por edhe me anëtarët  e tjerë të familjes, raporton Gazeta Sinjali.

Një rast i tillë ka ndodhur së fundi në një familje në rrugën ‘Ali Hadri’ në Ferizaj, ku një burrë dyshohet se ka ushtruar dhunë ndaj bashkëshortes së tij.

Burimet e Gazetës Sinjali brenda Prokurorisë kanë bërë me dije se 54-vjeçarja ka kërkuar ndihmën e Policisë, ku ka rrëfyer në detaje se si ka ndodhur ngjarja.

Bazuar në dëshminë e saj, burri i saj ka ushtruar dhunë ndaj, duke e kapur për fyti, si pasojë e një mosmarrëveshje mes tyre.

Si rezultat i raportimit të rastit të fundit, i dyshuari është arrestuar dhe shoqëruar në stacion policor, ku është intervistuar lidhur me rastin.

Me urdhër të Prokurorit të Shtetit, i njëjti është dërguar në mbajtje dhe ndaj tij është iniciuar rasti ‘Dhunë në familje’.