Dy standarde në ndërtim: Ura në Mitrovicë përfundon për më pak se dy muaj, urat në Podujevë presin mbi dy vite

Para dy javësh, Kryeministri i Kosovës, Albin Kurti, përuroi urën e re mbi lumin Ibër në Mitrovicë, e cila u ndërtua nga e para dhe u përfundua për më pak se dy muaj. Me një gjatësi të konsiderueshme, ajo është bërë ura e 36-të në Kosovë mbi lumin Ibër dhe tashmë është e hapur për qarkullim të automjeteve.

Ky zhvillim është prezantuar nga Lëvizja Vetëvendosje si shembull i suksesit dhe angazhimit të qeverisë në realizimin e projekteve të mëdha infrastrukturore.

Por situata është krejt ndryshe në magjistralen Podujevë–Prishtinë. Në këtë rrugë, ku punimet për disa ura nisën më shumë se dy vite më parë, projektet ende nuk janë përfunduar. Magjistralja mbetet e bllokuar pjesërisht nga kantierët e hapur, duke krijuar vështirësi për qarkullimin e qytetarëve.

Rruga Podujevë–Prishtinë ka rëndësi të veçantë, jo vetëm për banorët e Llapit, por edhe si nyje e rëndësishme ndërkombëtare që lidh Kosovën me Shqipërinë dhe vendet e tjera të rajonit. Pavarësisht kësaj, vonesat e gjata kanë ngritur dyshime tek qytetarët për standardet dhe prioritetet që po aplikohen në projektet e ndërtimit të urave.

Ky kontrast mes efikasitetit në Mitrovicë dhe vonesave në Podujevë–Prishtinë po hap debat mbi mënyrën se si qeveria dhe kompanitë kontraktuese po menaxhojnë projektet infrastrukturore në vend./PodujevaPRESS.net/