Dy dorëheqje për një muaj, çka po ndodh në kabientin e Shpejtim Bulliqit në Podujevë?

Para disa ditësh dha dorëheqje Drejtori i Inspeksionit në Komunën e Podujevës, Alban Zeka, kurse dje dorëheqje dha edhe Drejtori i Planifikimit Urban dhe Mbrojtjes së Mjedisit, Leutrim Krasniqi, njofton PodujevaPRESS.net.

Në njoftimin e Komunës së Podujevës thuhet se “Kryetari Bulliqi ka liruar nga detyra drejtorin e Planifikimit Urban dhe Mbrojtjes së Mjedisit, Leutrim Krasniqi, pas kërkesës së tij. Kryetari Bulliqi e ka falënderuar për punën dhe kontributin e tij, si dhe i ka dëshiruar suksese të mëtutjeshme drejtorit Krasniqi”.

Kurse Leutrim Krasniqi në një postim në rrjetin social Facebook ka shkruar se “Sot kam kërkuar lirimin tim nga pozita e Drejtorit të Planifikimit Urban dhe Mbrojtjes së Mjedisit në Komunën e Podujevës. Ky vendim vjen si rezultat i disa arsyeve personale dhe profesionale për avancim në karrierë, të cilat e bëjnë të pamundur zhvillimin e detyrës sime në këtë pozitë”.

Mirëpo burimet PodujevaPRESS brenda komunës kanë treguar se bëhet fjalë për raporte jo të mira të Shpejtim Bulliqit me këta drejtorë. Burimet kanë treguar se mes Bulliqit dhe këtyre drejtorëve kishte edhe fjalosje e tensione çka kishte bërë të pamundur vazhdimin e punës për këta drejtorë.

Burimet e sigurta brenda kabinetit Bulliqi kanë treguar se ngritje tensiones, fjalosje e shpesh herë presione në punë ka në vazhdimësi, edhe me drejtorë tjerë por që ata po e “durojnë” këtë presion. Por nuk përjashtohet mundësia që pas zgjedhjeve të përgjithshme të ketë ndryshime tjera në kabinet.